E vola e dua na ripote e tinikalima na tabana, e dua ilawalawa e vakatokai na Working Group on Arbitrary Detention. E qarava na nodra dodonu na lewenivanua qai cakacaka tiko kei na Matabose kei Vuravura. E vola ni beca o Rusia na lawa ni veimatanitu ni vesuki ira e 18 na iVakadinadina i Jiova ena veivanua e Rusia mai na Me 2018 ina Julai 2019. E vinakata na isoqosoqo qori vua na matanitu o Rusia me sereki ira na iVakadinadina i Jiova qori ena kena gauna totolo duadua.

E sevutaka na isoqosoqo qori na imatai ni ripote lekaleka ena Me 15, 2020. Ia na kena ripote taucoko ena qai biu yani ena website ni Matabose kei Vuravura ena dua ga na gauna qo.

Qo sa ikatolu ni gauna ena yabaki sa oti me vola kina na veika me baleti ira na tacida na ilawalawa qori. E vakaraitaka ena ivola ni cata na veika tawadodonu e cakava tiko o Rusia vei ira na tacida.

E kaya ni sega tale ga ni taleitaka na kena vakayacori vei ira na iVakadinadina i Jiova na “ivalavala kaukaua” ena gauna era vesu kina, e “sega tale ga ni dua na kena yavu vinaka mera cakava kina qori na ovisa.” E kaya tale ga ni sega ni dodonu me “vesu e dua na iVakadinadina i Jiova, me qai bala e valeniveivesu. E sega tale ga ni dodonu mera veilewaitaki, se me caka qori ena dua na gauna mai muri.”

E vakacala na WGAD na veibeitaki nira vakavuna na iVakadinadina i Jiova na tiko yavavala. E vakamacalataka nira vakayagataka tiko ga na tacida na “nodra dodonu ni sokalou.”

E ripotetaka tale ga na ilawalawa qori ni cata na ka e caka vei ira na tacida ena gauna era veilewaitaki tiko kina. Kena ivakaraitaki, na nodrau a tu ena loma ni bai kaukamea e rua na tacida yalewa ni rau rairai ena mataveilewai. E vakamacalataka ni tukuni ena lawa ni veimatanitu, ni noda dodonu kece na kawatamata “na noda okati meda tawacala vakavo sara ke tauca na mataveilewai ni dina na ka eda beitaki kina.” Kena ibalebale, e cala sara tu ga na nodrau vesu tu ena loma ni bai kaukamea na tacida yalewa qori. Na ka e caka qori e vaka ga e tukuna tiko ena mataveilewai ni rau daubasulawa vakarerevaki.”

E vakarota na WGAD vei Rusia me sereki ratou na le 18 na tacida ena kena gauna totolo duadua me vaka e tukuni ena lawa ni veimatanitu. E tukuni tale ga vua na matanitu o Rusia “me vaqaqa kece vakamatailalai na ka e vakavuna nodra vakalolomataki na tacida, mera veilewaitaki tale ga o ira na bukana na ka kece qori.”

E tukuni ena ripote qori ni “levu tale na iVakadinadina i Jiova,” sega ni o iratou ga na le 18, era vesu qai beitaki nira daubasulawa, dina ga nira vakaraitaka tiko na dodonu ni nodra sokalou. Na dodonu qori e tiki ni veidinadinati ni veimatanitu e lewena tale ga o Rusia. Koya gona, dina ni vagolei na ripote qori vei ratou na le 18 na tacida, ia e vakamatatataka na WGAD nira na “wili tale ga kina o ira kece e vakalolomataki me vakataki iratou na tacida qori.”

Eda sega ni vakadeitaka nira na sereki na tacida e Rusia ena nodratou ripote qori na WGAD, ia eda nuitaka ga ni na vinaka cake na ituvaki. Eda sa wawa macala tu ga qo vei Rusia. Ena gauna mada ga qo, dua na ka na nodra yaloqaqa na tacida mai Rusia nira vosota tiko na veivakacacani. Eda kila ni na vakasinaiti ira tiko ga na Tamada dauloloma o Jiova ena marau kei na vakacegu nira dau nuitaki koya.—Roma 15:13.