Ena ika19 ni Okosita 2021, e kaya na mataveilewai na Birobidzhan District Court of the Jewish Autonomous Region mai Rusia, ni cala o Sister Guzeva. Ena vakatatabutaki me 30 na vula.

Anastasiya Guzeva

• Sucu: 1979 (Birobidzhan)

• Me baleti koya: Rua na tacina tagane, qai susugi ratou ga o tinadratou. Ni se gone, e taleitaka na wilivola, qito kei na danisi (ballroom dancing). Ni yabaki tini, e kunea na iVolatabu ena vale nei nona bu. Qori e uqeti koya sara ga me via kila eso tale na ka me baleta na Kalou. Oti rau vulica sara kei tinana na iVolatabu kei ira na iVakadinadina i Jiova. Rau qai papitaiso vakaveitinani ena 1995. Rau vakamau o Konstantin kei Anastasiya ena 2001

Ena Me 2018, era vaqaqara na ovisa ena nodrau vale o Anastasiya kei Konstantin. Ena Julai 2019, e beitaki o Konstantin ni vakavuna na “tikoyavavala.” Qori tale ga na ka a beitaki kina o Anastasiya ena Feperueri 2020. Era beitaki e 23 na iVakadinadina i Jiova ena 19 na kisi ena Jewish Autonomous Region.

E dredre na ituvaki rau sotava o Anastasiya kei Konstantin ena vuku ni nodrau veilewaitaki. Rau vakacegui mai na koronivuli ni vakatagi rau veivakavulici tiko kina, ni rau beitaki ni rau vakavuna na “tikoyavavala.” Ena Feperueri 2021, e vakatatabutaki o Konstantin me rua veimama na yabaki.

Qo na ka e kaya o Anastasiya ni vukei koya me vosota: “E yaga vakalevu mo namaka tiko ni o na vakacacani. Mo vakatovotovotaka tale ga na ka mo cakava ni o sotava na ituvaki dredre. Kena vakaraitaki, nida wilika na ka e sotava o Jisu ena iotioti ni nona siga e vuravura, e rawa nida vakadeitaka ni sa vakarautaki koya rawa tiko ena ka me cakava ena gauna ena vesu kina, . . . gauna me vosa kina, gauna me galu kina, kei na ka me tukuna.”

E vakadeitaka o Anastasiya ni sa qai vakaibalebale vua ena gauna qo na ka e tukuni ena Roma 8:38, 39. E kaya o Anastasiya: “E dodonu meda marautaka na ka e tukuni ena tikinivolatabu qori. Rau lomani au na Turaga Kaukaua Duadua e lomalagi kei vuravura, ya o Jiova kei Jisu. Ena sega ni dua ena tawasei au mai na loloma qori. Noqu dau vakasamataka qori, e uqeti au meu vosota qai yaloqaqa tiko ga.”