Ena ika2 ni Seviteba, 2019 e totogitaki o Brother Valeriy Moskalenko na Zheleznodorozhniy District Court of Khabarovsk, e Rusia, me veivuke ena itikotiko me rua na yabaki, rua tale ga na vula. E vakatabui tale ga vua eso na ka me ono na vula. Ena sega ni curu tale e valeniveivesu.

Oti na vakatulewa qori, e sere sara o Brother Moskalenko. Dua na ka nodra marau na lewe ni nona vuvale kei ira nona itokani. A curu e valeniveivesu o Brother Moskalenko ena ika2 ni Okosita, 2018, ia ni bera qori e cakacaka ena sitimanivanua, e qaravi tinana tale ga e tautauvimate. E sega ni vakatarai me biuta na vanua o Khabarovsk ena ono na vula ena vakatabui kina vua eso na ka, me ripote tale ga vei ira na vakailesilesi ni muria tiko na ka kece e vakaroti vua.

Ena ika30 ni Okosita, e tinia o Brother Moskalenko nona ivakamacala e valeniveilewai, e kaya: “Au na sega vakadua ni beca na lewa ni Kalou e vakamatatataki tu ena iVolatabu. Se mani itotogi cava au vakarerei kina, seu vakamatei mada ga, au vinakata me kilai niu na sega vakadua ni biuta na Dauveibuli kaukaua duadua ni lomalagi, kei na vuravura, na Kalou o Jiova.”

E mata ni iSoqosoqo ni iVakadindina i Jiova e Urope o Yaroslav Sivulskiy, e kaya: “Keimami sega ni duavata ena ka e beitaki kina o Valeriy, ia keimami marau ni sa lesu i vale.”

Kuria ya, e le vitu tale na tacida tagane ena yasayasa o Khabarovsk, ratou se waraka tiko na macala ni ka ratou beitaki kina.

Eda vakavinavinaka vei Jiova ni yalodina tiko ga o Brother Moskalenko ena gauna e vesu tu kina. Meda masulaka ira mada ga na tacida ni na vakayaloqaqataki ira o Jiova mera vosota na veivakacacani ena vuku ni nodra vakabauta.—Aisea 40:31.