Ena ika6 ni Feperueri 2020, ratou vaculaki vei ira na yadra ni valeniveivesu e Penal Colony Nb. 1, e le lima na tacida tagane o Aleksey Budenchuk, Gennadiy German, Roman Gridasov, Feliks Makhammadiyev, kei Aleksey Miretskiy, e Orenburg, e Rusia. E curu e valenibula o Brother Makhammadiyev ni kamusu na sarisarina, malumalumu nona yatevuso, e mavoa tale ga nona ivi. Ni ratou vaculaki oti o Budenchuk, German, Gridasov, kei Miretskiy, ratou mani vesu ena dua na rumu ni ratou beitaki ni ratou sainitaka vakailawaki e dua na pepa. Ratou beitaki tale ga ni ratou vakatavako, qori e dua na ka era sega ni dau cakava na iVakadinadina i Jiova.

Ena ika19 ni Seviteba 2019, ratou beitaki na le lima na tacida qori kei Konstantin Bazhenov vua na turaganilewa o Dmitry Larin ena Mataveilewai ni Yasana e Leninsky. Ratou totogitaki me ratou vesu me rua ina tolu veimama na yabaki. Ena ika20 ni Tiseba 2019, e sega ni via rogoca nodratou kerekere na Mataveilewai e Saratov, oti e vica na macawa ratou bala sara e valeniveivesu. A vesu o Brother Bazhenov ena Penal Colony Nb. 3 ena yasayasa e Ulyanovsk, e sega ni caka vua na itovo vakaloloma a caka vei ratou na vo ni tacida ena Penal Colony No. 1.

Ena ika6 ni Feperueri 2020, ratou vaculaki na lima na tacida tagane qori ena gauna ratou yaco kina ena Penal Colony Nb. 1. Ratou sega ni laurai vakavuniwai, e qai kilai ga ena siga e tarava ni tauvi Brother Makhammadiyev na matetaka, e laurai tale ga na dra ena nona suasua. E usuraka vua na vakailesilesi ni valeniveivesu me sainitaka na ivola ni “sisi e valenisili qai lutu,” oti e qirita sara na lori ni valenibula. E mani curu e valenibula o Brother Makhammadiyev, qai vinakati me sele me rawa ni kau tani mai na wai e tu e nona yatevuso. E vakatovolei tale ga vua eso na ka vakavuniwai, qai laurai ni tauvi koya na mate ni viakana, nira sega ni via solia na vakailesilesi ni valeniveivesu na kakana e dodonu me kania.

Eda nanumi ratou dina na tacida qori e Rusia, ni ratou vosota na veika tawadodonu kei na veivakalolomataki qo. Ia eda nuidei ni o Jiova ena tokoni ratou tiko ga, ratou qai yalodina vua.—Filipai 1:27, 28.