Ena ika7 ni Epereli 2023, e sere mai valeniveivesu o Brother Rustam Seidkuliev. Oti e vica na vula e qai vakatalai i Turkmenistan ena ika17 ni Seviteba 2023. Na vuna? Ni sega ni vakadonuya na matanitu o Rusia me lewenivanua i kea. Ia e nuidei tu na watina o Yuliya me na sotavi koya tale.

E sivia ni 7 na vula nona vakatatabutaki i vale o Rustam, qai rauta ni 23 na vula nona tu e valeniveivesu. E donu tu ga nona rai ena gauna kece qori, qai dei na nona vakabauti Jiova. Gauna e vesu tu kina, a vola e dua nona ivola qai vakamacalataka kina na ivakaraitaki vakaivolatabu e vukei koya me vosota. E vola: “E uqeti vakalevu nodrau ivakaraitaki o Nepoci kei Mefiposeci. Rau a beitaki vakailasu, ia rau yalodina tiko ga vei Jiova. Qori e vukei au meu vosota na kequ ituvaki qai dei ena inuinui.”

Ni tu e valeniveivesu o Rustam, e vakatarai vei Yuliya me sikovi koya ga vakadua ena veiyatolu na vula. Ia rau dau veivakayaloqaqataki ni rau veivosaki ena talevoni e veisiga, e okati kina nodrau raica vata na Dikeva na iVolatabu e Veisiga kei na kena ivakamacala.

Ni bera ni vesu o Rustam, e kaya: “O Jiova e kila vinaka tu na ka kece, e tu vakarau tale ga me vukei keda ena sala kei na gauna donu. E bibi gona meu nuitaki koya tiko ga.”

Eda nuidei ni o Jiova ena vukei Rustam kei Yuliya, ni rau nuitaki koya tiko ga me nodrau ivakaruru qai nodrau idrodro.—Same 91:2.