A vesu tiko o Brother Dennis Christensen e valeniveivesu me sivia e 525 na siga ena vuku ni nona vakabauta, e rairai tale ga vaka50 ena mataveilewai. E tuvanaka na Mataveilewai ni Yasana na Zheleznodorozhniy District Court, e Oryol, mai Rusia, me na rogoci nona kisi ena loma ni vula o Tiseba. Sa sivia e 18 na vula nona vesu tiko o Dennis, ia e marau qai donu tiko ga nona rai. Macala ga ni vakayaloqaqataki koya tiko o Jiova, me isau ni nodra nanumi koya tiko ena masu e levu na mataveitacini e vuravura raraba.

Dua na ka na levu ni ivola kei na droini ni vakanuinui vinaka, kei na veinanumi era vakauta vei Dennis na mataveitacini e Rusia kei ira ena so tale na vanua. Ena gauna e veilewai kina ena ika30 ni Okotova, e vakaraitaka toka o Dennis ena iloilo ni vanua e dabe tiko kina, eso na ivola kei na nodra droini na gone a vakau yani vua mera raica o ira kece na gole yani.

Era tokoni Dennis na mataveitacini e vuravura raraba, rogoci tale ga e vuravura raraba na kena itukutuku ra qai kauai mai kina. Ena ika21 ni Julai, 2017, e vakatulewataka na tabana e dau valataka nodra dodonu na lewenivanua e Moscow, na Memorial Human Rights Centre, ni vesu o Dennis ena vuku ni nona rai vakapolitiki. Ia ena ika20 ni June, 2018, e kerea na matabose e valataka nodra dodonu na lewenivanua e Rusia na Russia’s Human Rights Council, me vaqaqa na Valenivolavola ni Dauveibeitaki ke donu tiko vakalawa nodra vesu na iVakadinadina i Jiova ena vuku wale ga ni ka era vakabauta. Ena ika26 gona ni Seviteba, 2018, sa qai vakatulewataka na tabana ni veivaqaqai mai Merika na United States Commission on International Religious Freedom, ni “vesu” o Dennis “ena vuku ni nona vakabauta vakalotu.”

E tukuna na matanitu o Rusia ena mataveilewai, ni kena vakatabui na isoqosoqo ni iVakadinadina i Jiova ena sega ni vakaleqa nodra dodonu yadua na lewena mera cakava na ka era vakabauta. Na tabana ni lawa e kea, kei ira na dau bulia ga vakataki ira nodra lawa, se vakatulewa era sega sara ga ni via kauai ena vakatulewa qori. Era vakayagataka ga vakatawadodonu me yavu ni nona vesu o Dennis kei ira eso tale nira beitaki nira “vakavuna na tiko yavavala.” Na yabaki qo, e vakaitavi tiko na matanitu o Rusia ena nodra curumi vakaukaua na veivale ena veiyasana e kea. Me yacova mai qo, e le 25 na tacida era vesu tu, e le 18 e sega ni vakatarai mera biuta na nodra vale, e le 40 era vakatabui tu ena so tale na ka. Na macala ni nona veilewai o Dennis ena qai vakatau kina na ka me caka vei ira na 90 tale na iVakadinadina i Jiova, ena rauta na 30 na vanua e Rusia, era se waraka tale tiko ga na macala ni nodra beitaki nira daubasulawa.

Meda duavata tiko ga kei ira na noda vuvale e vuravura raraba nida masulaki ira na tacida qori me vakaukauataki ira o Jiova, qai vakayaloqaqataki ira. Se ra mani veilewaitaki ena vuku ni nodra vakabauta, eda rai vakanamata tiko ga ena siga ena raica kina o Jiova “me vakayacori na lewadodonu” vei ira.—Luke 18:7.