E vica na tabana ni vakauitukutuku e vuravura raraba era ripotetaka nira kunea na vakailesilesi eso na “iyaragi”ena dua na veivaqaqai se qai caka tiko ga ena yasayasa o Kirov mai Rusia. E tukuni ni nodra na iVakadinadina i Jiova, ia na vale e kune kina e nona e dua e sega ni iVakadinadina i Jiova. Qori na “iyaragi” mai na iKarua ni iValu Levu e wili kina e rua na gasaukuro, kei na dua na bomu e dau bulu. E iVakadinadina i Jiova ga na watina na turaga e kune ena nona vale na iyaragi qori, e sega mada ga ni kila ni tiko vei watina na iyaragi qori.

O koya e nona na iyaragi qori e iliuliu tu ni dua na tabana ni dauveivaqaqai kilai levu, na Russian “Poisk,” se “Dauveivaqaqai.” E nodra cakacaka na vaqara na ivovo ni yagodra na sotia era mate ena iKarua ni iValu Levu mera lai bulu vakavinaka. E dau kunei gona kina eso na iyaragi se iyaya era vakayagataki ena ivalu, okati kina na iyaragi sa ca tu.

Nida dau tutaka na bula veiyaloni, era sega ni cegu na vakailesilesi e Rusia na vakaucacataki keda, kei na nodra beitaki keda. Eda nanuma kina na ka e parofisaitaka o Jisu, ni o ira na dauveitusaqati era na “vosavakacacataki” ira nona tisaipeli.—Maciu 5:11.