Ena ika8 ni Tiseba 2022, ena rogoci ena mataveilewai na Gwangju District Court e Sauca Korea na kisi me baleti Brother Hye-min Kim. O Hye-min e imatai ni lewenivanua e Sauca Korea e sega ni via ciqoma na cakacaka era qarava na sega ni via curu ena mataivalu ni okati me itotogi. Ena rawa ni vesu me 36 na vula, ena okati tale ga me daubasulawa.

E balavu duadua e vuravura na 36 na vula mera qarava kina na cakacaka na sega ni via curu ena mataivalu e Sauca Korea. Qori e vakaruataki kina na balavu ni gauna e rawa ni veiqaravi kina e dua na lewenivanua ena mataivalu. Ena loma ni tolu na yabaki qori, era na sega ni vakatarai mera biuta na nodra icili, ia mera na tiko ga ena lomanibai ni valeniveivesu. E levu tale ga na ka e vakatabui mera cakava. Koya gona, e levu na kenadau e veiyasai vuravura era sega gona ni okata na cakacaka qo me isosomi ni curu ena mataivalu. Era kaya ga ni qo e vaka tale e “dua na itotogi.” a

Ena ika28 ni June 2018, e raica na mataveilewai na Constitutional Court e Sauca Korea ni taqomaki ena Yavu ni Vakavulewa na nodra dodonu na sega ni via vakaitavi ena mataivalu. E kaya vei ira na vakailesilesi: “Kevaka e dua na lewenivanua e sa sega ni qarava rawa na cakacaka ni sa rui tarabi vua, qori e sa na okati me itotogi. E sega ni inaki taumada e vakarautaki kina na cakacaka. Ena beci tale ga kina na nona dodonu.”

Ena 1998, e vakarautaka na tabana ni UN na ivakarau ni cakacaka me qaravi ke sega ni via curu e dua ena mataivalu. E vakadreti ira na matanitu mera vakarautaka na cakacaka “ena yaga vei ira na lewenivanua, ia me kua ga nira totogitaki kina.”

Qo e sega ni imatai ni gauna e beitaki kina o Brother Hye-min ena basulawa. Ena Seviteba 2020, e talaci na nona kisi ni a veilewaitaki ni sega ni via curu ena mataivalu. Oti e vica na macawa, e kerea me soli vua e dua na cakacaka. E wawa tu me yacova na ika7 ni Feperueri 2022, me tekivu na nona cakacaka. Ia ni oti nona dikeva vinaka na ka e okati ena cakacaka qori, e vakatulewataka me kua ni vakaitavi kina.

Ke duavata kei Brother Hye-min na mataveilewai, ena rawa ni vakavuna me veisautaka na matanitu na cakacaka me soli vei ira na sega ni via curu ina mataivalu. Ena yaga vakalevu qori vei ira na vo ni lewenivanua e Korea, okati kina o ira na tacida tagane kei ira na lewe ni vuvale. Ena gauna mada ga qo, meda masulaki ira tiko ga na tacida mera nuitaki Jiova tiko ga, me vukei ira mera ‘vosota na ka kece ena vosovoso kei na marau.’—Kolosa 1:11.