Ena ika18 ni Janueri 2021, e vakataulewa na mataveilewai i Turkmenistan ina kisi me baleti Brother Azamatjan Narkuliyev. E totogitaki me rua na yabaki ena valeniveivesu era tu kina na kaivesu era cala bibi, ni sega ni via curu ena mataivalu. Qo sa ikarua ni gauna me vesu ena vuku ni nona tawaveitovaki.

Azamatjan Narkuliyev

• Sucu: 2000

• Me baleti koya: Papitaiso ena 2018. E yalomalumalumu, daudina qai dau gugumatua. Ratou iVakadinadina i Jiova tale ga o tinana, kei rau na ganena

E yabaki 20 o Azamatjan. Ena ika7 ni Janueri 2020, sa sere mai valeniveivesu ni oti e dua na yabaki nona vesu tu ena vuku ni nona vakabauta. Era na rawa ni veilewaitaki vakarua o ira era tawaveitovaki ena ivalu e Turkmenistan. Oti ga e lima na vula nona sere mai o Azamatjan, era vakaroti koya tale na vakailesilesi ni mataivalu me curu ina mataivalu. Ia a sega ni vinakata, mani beitaki tale ni daubasulawa ni sega ni via vakaitavi ena mataivalu era sega ni tauri iyaragi.

Ena ika20 ni Tiseba 2020, era tauyavutaka na dauveibeitaki e dua nona kisi me beitaki kina. Era taura tale ga nona pasipote.

Meda masulaki Azamatjan kei ratou nona vuvale. Ena vakalougatataki dina na nodratou dei me ratou yalodina tiko ga. E vakadeitaka vei keda na iVolatabu ni ‘[o Jiova] ena yalodina vei koya e yalodina.’—Same 18:25.