E kacivaki ena Okosita 2022, ni na caka tale na vunau e veivale ena veivanua e Ukraine e sega ni leqataki kina na bula. Dua na ka nodra nanamaki na tacida mera vakaitavi kina. Era raica ni levu era via rogoca na itukutuku ena iVolatabu. E kaya e dua e taleitaka me vulica na iVolatabu: “Oti na veika vakadomobula kei na rarawa e yaco ena gauna ni valu, au vakadeitaka ni Kalou duadua ga ena walia na noda leqa.” Qo eso na irogo ena cakacaka vakavunau.

O Ruslan e tiko ena ivavakoso e Lanivtsi. A lomaleqa vakalailai me vunau tale e veivale. Rau mani masuti Jiova vakaveiwatini me vakadoudoutaki rau, me rau kunei ira tale ga era via kila tu na inuinui ena gauna vinaka se bera mai. Ni tekivu na cakacaka vakavunau, rau kurabui ni rau vosa rawa vei ratou e le 8 ena loma ga ni rua na aua. Ratou qai vinakata kece me ratou vulica na iVolatabu.

O Olha e tiko ena ivavakoso e Kremenets. Dua na siga ni cakacaka vakavunau tiko, a cici yani vua kei na nona itokani e dua na tagane. E taroga sara ke rau wasea tiko vei ira na lewenivanua na Vosa ni Kalou. E kaya na tagane qori: “Au dau kana tavako, au daugunu tale ga. Au kila ni dua na siga ena lewai au na Kalou. Au sega ni vinakata me va tu qo na kequ ituvaki ena gauna ya.” E tuvanaki sara me rau vuli iVolatabu kei na dua na tacida e tiko ena yasayasa ya.

O Vasyl e tiko ena ivavakoso e Lviv-Riasne-Skhidnyi. Era cakacaka vakavunau na nona iwasewase ena dua na koro. E qai raica nona vale e dua na marama a vosa kina vua ena vica na yabaki sa oti. Sa qai vakasamataka mai ni marama qori a sega sara ga ni via vosa vei keda na iVakadinadina i Jiova. Ia mani nanuma o Vasyl me tukituki mada ga, qai taroga ke via vuli iVolatabu. E kidacala ni dolava mai na katuba na marama qori, qai kaya ni via kila na iVolatabu. E taleitaka me vulica na iVolatabu, e tuvanaki tale ga e dua me lesuvi koya.

Ena 2021, e papitaiso o Serhii, qai tiko ena ivavakoso e Illintsi. Qo se qai imatai ni gauna me vunau kina e veivale. Dua na ka nona lomaleqa, mani saga me vakavakarau vinaka. E kaya: “Au sarava vakavica vata na vidio ni vakatutu ni veivosaki. Qori e vakadoudoutaki au sara ga.” E vakila o Serhii na marau ni wasea vei ira eso tale na itukutuku vinaka.

Ena Okosita 2022, e dautukutuku bera ni papitaiso o Nikol, qai tiko ena ivavakoso e Rozdil. E kaya: “Dua na ka noqu rere qai lomaleqa nida na vunau tale e veivale. Ia au marau niu lai tukuni Jiova sara ga vei ira na itaukeinivale!”

Me yacova mai na ika11 ni Noveba 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine ena rawa ni toso i cake na iwiliwili.

• Mate e le 46 na dautukutuku

• Mavoa e le 97 na dautukutuku

• Tokitaki e le 12,569 na dautukutuku

• Vakarusai e 590 na vale

• Vakacacani vakalevu e 645 na vale

• Vakacacani vakalailai e 1,722 na vale

• Vakarusai e 6 na Vale ni Soqoni

• Vakacacani vakalevu e 19 na Vale ni Soqoni

• Vakacacani vakalailai e 63 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na le 53,948 na dautukutuku ena vanua mera taqomaki kina

• Era dro e le 25,983 na dautukutuku ena so tale na matanitu, ra qai vukei vei ira na tacida e kea