Eda masulaki ira tiko ga vagumatua na tacida e Mariupol, ni yaco tiko kina na veivaluvaluti kei na kacabote ni bomu. Ka ni rarawa ni ratou mate e ono na tacida ena gauna e kacabote tiko kina bomu. Ratou sa takali e Ukraine e tini na tacida. E ripotetaki tale ga ena nius, ni kacabote ena macawa sa oti e dua na bomu ena valenisarasara era vakaruru tu kina e sivia ni 1,000 na lewenivanua. E sega ni mate e dua na tacida ia e le vica ga ratou mavoa.

Era sa dro tani rawa mai Mariupol e rauta ni 750 na tacida, ia era se tiko ga i kea e voleka ni 1,600 na tacida. Levu vei ira na tacida era se tiko ga ena tokalau ni siti o Mauripol, era sa taura tu vakaukaua na sotia ni Rusia.

Me vaka ga e sa tabaki oti, nira vakaruru tiko ena tabavale e ra ni Vale ni Soqoni e rauta ni 200 na tacida. E rawa na veitaratara kei ira na tacida ena dua ga na gauna lekaleka, qo na ka era tukuna mai:

“Era domobula eso na tacida ena gauna e kacabote tiko kina na bomu. So era tagi. Ni keimami rogoca na kacabote ni bomu e tuba, keimami nanuma ni keimami na mate. E tukuna e dua na qase ni vavakoso me keimami laga sere ni soqoni. Keimami lagata veitaravi e rauta ni 15 na sere. Na rogolevu ga ni kacabote ni bomu kei na yavavala ni tabavale keimami tiko kina, na rogolevu tale ga ni neimami lagasere. Keimami wilika qai veivosakitaka na Same 27. Keimami qai dui tukuna na neimami tikinivolatabu taleitaki qai vakamacalataka na sala e vakaukauataki keimami kina. . . . Keimami vakila dina ni o Jiova e ‘Tama ni yalololoma, na Kalou e dau vakacegui keda ena ka kece,’ ena vukei keda meda lomavakacegu.”—2 Korinica 1:3, 4.

Era vakuai ira na qase era lewe ni Komiti ni Vakacoko (DRC) mera vaqarai ira na tacida qai vakarautaka na kakana kei na wainimate era gadreva. Dina ga ni ririkotaki kina nodra bula. Eso na gauna era na qasi mera taqomaki ira mai na veivanavanai ena gauna era vaqarai ira tiko kina na tacida ena siti. Eda vakavinavinakataki ira na tacida qo nira ‘bolemate’ ena vukudra na tacida.—Roma 16:4.

Ni sega na livaliva kei na kasi, era yaloqaqa na tacida yalewa ena siti mera vasaqa e tautuba. Qori mera kana kina na dautukutuku itabaqase kei na lokiloki. Levu na tacida era vakayalia na ka era taukena me vaka na nodra vale kei na motoka. Ia era marau tu ga nira vakila nodra loloma kei na nodra veitokoni na tacidra vakayalo.

Era saga mera dei tiko ga ena nodra ituvatuva vakayalo nira vulica vata na iVolatabu qai vunau vei ira eso tale.

Me yacova mai na ika22 ni Maji, 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili.

• Mate e 10 na dautukutuku

• Mavoa e 27 na dautukutuku

• Dro e 33,180 na dautukutuku ena so tale na vanua e Ukraine e sega ni caka kina na veiraravui

• Vakarusai e 78 na vale

• Vakacacani vakalevu e 102 na vale

• Vakacacani vakalailai e 484 na vale

• Vakarusai e 1 na Vale ni Soqoni

• Vakacacani vakalevu e 4 na Vale ni Soqoni

• Vakacacani vakalailai e 18 na Vale ni Soqoni

• Sa veivuke tiko e Ukraine e 27 na Komiti ni Vakacoko

• Era veivuke tiko na DRC vei ira na 25,069 na dautukutuku ena vanua mera taqomaki kina

• Era dro e 14,308 na dautukutuku ena so tale na matanitu, ra qai vukei vei ira na tacida e kea