Ena ika15 ni Julai, 2019 me yacova na ika31 ni Tiseba, 2019, era gumatua na tacida na cakacaka vakavunau ena veikoro ena vuaira kei Venezuela, ena tokaitua kei Guajira. Era vakaitavi kina e rauta na le 640 na dautukutuku, ra qai vakayagataka e sivia e 32,000 na aua. E tauyavutaki tale ga e rauta ni le 2,000 na vuli iVolatabu.

E yalava vakaitamera toka na vanua qori, dredre na sala ni veitosoyaki, qai le lailai na dautukutuku era tiko kina. Levu na lewenivanua e kea era se sega ni sotavi ira na iVakadinadina i Jiova, se rogoca na yaca ni Kalou. Era vakuai ira gona na tacida mera vunau vei ira me rawa nira kilai Jiova. E se vakilai tiko ga e Venezuela na leqa vakailavo, levu era sa sega ni cakacaka, sau levu tale ga na kakana kei na so tale na ka mera bula kina. Eso na dautukutuku era maroroi lavo me vica na vula, se volitaka na iyaya era taukena me rawa nira vakaitavi ena cakacaka lavotaki qori.

E vakayacori na cakacaka vakavunau ena vosa vakaSipeni kei na vosa vakaWayúunaiki (qori nodra vosa na Wayúu, era tiko ena dua na vanua tu yawa). E vica ga na dautukutuku era kila na vosa qori, ra mani vakarautaka na dautukutuku eso na ka me rawa nira vunau kina, me vaka na ivola vakaiVolatabu ena vosa vakaWayúunaiki, vidio ni veivakavulici, kei na brochure e vakamacalataka nodra itovo vakavanua na Wayúu.

Dua na ka nona taleitaka e dua na marama nona rogoca na itukutuku vinaka ena nona vosa. E mani bole me kauti ira na dautukutuku ena vanua tu yawa era tiko kina eso na wekana kei ira nona itokani. Era yadra vakamataka na tacida, ra vakavakarau, ra lai raici koya sara na marama qori e nona vale. Oti ra mani taubale me dua na aua.

Nira yaco yani, e kailavaka sara na marama qori: “Dou curu mai tuba! Mai! Au sa kauta tiko mai qo na Kalou!” Dua na ka nodra kurabui na dautukutuku, ra mani gole i tuba na itaukeinivale, ra kauta tale ga nodra dabedabe mera vakarorogo. Qo na imatai ni gauna mera rogoca kina na ka me baleta na Kalou. Na levu ni nodra vakavinavinaka era vakarautaka na kedra katalau na le 17 na dautukutuku.

Dua na ka nona marau na marama qori ni raica nodra taleitaka na vakarorogo na itukutuku vinaka. E mani bole me kauti ira na tacida ena tolu tale na koro. Na koro kece era gole kina, ena kailavaka mera gole mai tuba na lewenikoro mera rogoca na itukutuku vinaka. Dua na ka nodra luluvu na dautukutuku nira vakamoce vua na marama qori, kei ira eso tale, ra qai lagata na sere ni soqosoqo ena vosa vakaWayúunaiki.

E vinakata o Jiova mera rogoca kece na lewenivanua na itukutuku vinaka. Na cakacaka vakavunau qori, e vakadinadinataka ni vakalougatataka tiko o Jiova nodra sasaga nona tamata nira “tukuna na itukutuku vinaka ni ka vinaka ena vanua tu yawa e veiyasa i vuravura.—Roma 10:14, 15.