“Levu ni noqu nuiqawaqawa ena vica na yabaki sa oti, e vaka ga au saga tiko e veisiga meu bokoca na kama. Au via vakamatei au ena gauna kece qori. Au vinakata meu kua ni vakila tale na mosi.”—Jonathan, yabaki 17.

 E laurai ena dua na vakadidike vei ira e rauta ni 14,000 na gonevuli ena sekeneri, ni voleka ni 1 ina 5 vei ira qori era kaya nira vakasamataka mera vakamatei ira ena loma ni 12 na vula sa oti. a Cava mo cakava ke o nanuma mo tinia koso nomu bula?

•   Wawa. Mo kua ni yalototolo. Rairai o na sega ni taqea rawa nomu leqa, ia e tiko eso na ka o rawa ni cakava mo vosota kina.

 De dua o nanuma ni sega ni wali rawa nomu leqa. Ia e sega ni daudina tu ga na ka kece eda nanuma. E tiko na ka o rawa ni cakava me wali kina nomu leqa. Ena rawa ni wali totolo tale ga ke veiganiti na sala o vukei kina.

•  iVakavuvuli vakaivolatabu: “Keitou sogolati ena sala kece, ia keitou se veitosoyaki rawa ga, keitou veilecayaki, ia keitou se dro rawa ga.”—2 Korinica 4:8.

   Vakatutu: Ke o vakasamataka tiko ga mo vakamatei iko, saga mo vakatataro se qara na veivuke e rawa ni caka vei iko. Rawa ni o veitaratara kei ira na kenadau, se gole i valenibula. O ira qori era vakavulici ena sala mera vukei iko kina, era vinakata tale ga mera veivuke.

•   Veitalanoa kei na dua nomu itokani. Eso era na kauaitaki iko dina, era via vukei iko tale ga. Qo e okati kina o ira nomu itokani, se lewenivuvale. Era na sega ni kila na ka o sotava tiko vakavo ke o tukuna vei ira.

 Eso era dara na matailoilo mera raica vinaka na ka. E va tale ga qori o ira nomu itokani. Era na rawa ni vukei iko me donu nomu rai ena ituvaki o sotava, mo marautaka tale ga na bula.

•  iVakavuvuli vakaivolatabu: “Na itokani dina . . . e tacida ena gauna ni rarawa.”—Vosa Vakaibalebale 17:17.

   Vakatutu: Rawa ni o tekivuna va qo na veivosaki, “Dua na ka noqu yalolailai tiko. Rawa ni daru veitalanoa mada?” Se o rawa ni kaya, “Au sotava tiko eso na leqa, au sega ni kila na ka meu cakava. Rawa ni o vukei au?”

•   Raici vuniwai. Na tauvimate me vaka na yalolailai kei na lomabibi, e rawa ni vakavuna mera tinia eso na nodra bula. Ia ka ni marau ni tiko na kena iwali.

 Ni o tauvi matetaka, rairai ena sega ni lomamu na kana. E va tale ga qori ni o yalolailai, e rawa ni vakavuna mo sega ni via bula tale tiko. Ia e rawa ni wali ruarua na tauvimate qori.

•  iVakavuvuli vakaivolatabu: “E sega ni yaga na vuniwai vei ira na bula vinaka, e yaga ga vei ira na tauvimate.”—Maciu 9:12.

   Vakatutu: Mo moce vinaka qai vakaukauayago, kania tale ga na kakana bulabula. Ena rawa ni tara na ivakarau ni lomamu ke o sega ni bulabula vinaka.

•   Masu. E kaya na iVolatabu “ni uasivia na lomada na Kalou, e kila tale ga na ka kece.” (1 Joni 3:20) Vakacava mo masuti koya wasoma? Mo cavuta na yacana qai masu mai vu ni lomamu.

 Eso na leqa o sotava o na sega ni walia ga vakataki iko. E tu vakarau na Dauveibuli me vukei iko.

•  iVakavuvuli vakaivolatabu: “Na ka kece me vakaraitaki vua na Kalou; ena qai taqomaka na lomamuni kei na nomuni vakasama na vakacegu ni Kalou.”—Filipai 4:6, 7.

   Vakatutu: Ni o talaucaka nomu leqa vei Jiova, vakasamataka tale ga e dua na ka mo vakavinavinakataki koya kina. (Kolosa 3:15) Ena rawa ni donu nomu rai ni o dau vakavinavinaka.

 Ke o via tinia nomu bula, mo qara totolo na veivuke. Qori na ka a cakava o Jonathan, sa cavuti oti mai. E kaya: “Au via talaucaka na lomaqu vei rau noqu itubutubu, qai qara na veiqaravi vakavuniwai. Au sa bulabula vinaka ena gauna qo. Dina eso na gauna au dau rarawa, ia au sega ga via vakamatei au.”