Vuna o na rairai digia kina qo: O via vakaraitaka vei ira nomu itokani ni tu vei iko na galala. O nanuma ni levu cake na ka o kila vei rau nomu itubutubu, se o sega ni doka na nodrau vakatulewa.—Vosa Vakaibalebale 14:18.

 Ka ena yaco: De dua era na qoroya na nomu itokani na ka o cakava, ia era na kila tale ga ni o dau veidabui. Ke o dabui rau nomu itubutubu, ena rawa tale ga ni o dabuitaki ira nomu itokani. Ni rau na kila qori na nomu itubutubu, ena vakararawataki rau, de o na cudruvi tale ga kina!—Vosa Vakaibalebale 12:15.

 Vuna o na rairai digia kina qo: O na rairai vakasamataka na veisureti qai vakatulewataka ni sega sara ni bibi, se nira sega ni itokani vinaka na sureti kina. (1 Korinica 15:33; Filipai 4:8) Ena yasana adua, de dua o via lako, ia o rere na kerea vei rau nomu itubutubu.

 Ka ena yaco: Ke o kila ni sega ni ka vakayalomatua mo ciqoma na veisureti, o na doudou ni tukuna qori vei nomu itokani. Ia ke o sega ni lako ni o rere na kerea vei rau nomu itubutubu, o na rairai toka ga e vale ena yaloca, qai veinanuyaka voli ni o sa calata tiko na marau.

 Vuna o na rairai digia kina qo: O kila ni rau lewai iko nomu itubutubu, o doka tale ga na nodrau vakatulewa. (Kolosa 3:20) O lomani rau nomu itubutubu qai sega ni via vakamosia na yalodrau. (Vosa Vakaibalebale 10:1) O na rawa ni vakamacalataka vei rau na ka o vinakata.

 Ka ena yaco: Erau na kila na nomu itubutubu ni o lomani rau qai dokai rau. Ke donu vei rau na nomu kerekere, de dua rau na soli iko mo lako.

 Kaya mada: Ke soli na digidigi, o na rairai vinakata mo sili ena baravi era tu kina na kena yadra. Na vuna? O sega ni kila na vanua e rivarivabitaki. Ia era raica vinaka tu na yadra na vanua e rawa ni yaco kina na leqa. E tautauvata vinaka qori kei ira na nomuni itubutubu, era kila vinaka na leqa e rawa ni yaco, nira sa lakosivita mai na ituvaki qori. Me vakataki ira ga na yadra ena baravi, e nodra inaki mera taqomaki kemuni, moni kua kina ni vakaleqai.

 Qo e dua tale na vuna: Erau vinakata nomu itubutubu me rau taqomaki iko. Na loloma ena uqeti rau me rau tukuna na io ke veiganiti, sega ke sa kena inaki ga. Ni o kerea nodrau veivakadonui mo cakava e dua na ka, erau na vakasamataka mada me rau vakadonuya se sega, se rau na rawa ni vosota ke yaco e dua na leqa. Erau na vakadonuya ga nomu kerekere ke rau vakadeitaka ni o na sega ni sotava na leqa.

Ka o rawa ni cakava

 Dau dina: Tarogi iko mada: ‘Na cava na inaki ni noqu lako? E kena inaki meu lai marau ga, se niu vinakata mera taleitaki au noqu itokani? Se, niu wedeva tiko e dua ena tiko ena pati?’ Kua ni lasutaki rau na nomu itubutubu. Erau a itabagone tale ga ena dua na gauna, rau qai kilai iko vinaka. Erau na kila vinaka na inaki ni nomu via lako. Erau na marautaka ni o talaucaka na lomamu vei rau, ena yaga tale ga vei iko na nodrau ivakasala. (Vosa Vakaibalebale 7:1, 2) Ena yasana adua, ke o lasu, erau na sega ni nuitaki se vakabauti iko, ena rawa sara ga ni rau sega ni vakadonuya nomu lako.

 Gauna: Kua ni kerekere ena gauna ga rau suka mai kina na cakacaka na nomu itubutubu se ni rau osooso tiko ena so tale na ka. E vinaka mo kerei rau ena gauna rau vakacegu tiko kina. Kua ni qai kerekere ni sa voleka na siga ni pati, se mo cikevi rau. Erau na sega ni taleitaka na nomu itubutubu me rau vakatulewa vakariri. Kerekere ni se vo levu tu na gauna, me rau vakasamataka vinaka kina.

 Vakamacalataka: Vakaraitaka vakadodonu na ka o via cakava. Era sega ni dau yalodei na itubutubu ke duatani mai na nodra isaunitaro na luvedra ena gauna era taroga kina: “O cei era na tiko kina?” “Ena tiko kina e dua e matua?” se “O na tiko e vale ena vica?”

 Rai Donu: Erau nomu itokani na nomu itubutubu, rau sega ni meca. Ke o dau tokoni rau nomu itubutubu, erau na rogoci iko rau tokoni iko tale ga.

 Vakaraitaka ni o sa tamata matua ena nomu ciqoma qai doka na nodrau vakatulewa. Ke o cakava qori erau na dokai iko. Ena gauna tarava o kerekere kina erau sa na vakadonuya na nomu kerekere.