•  Vuna e yaco kina

•  Tolu na ka o rawa ni cakava

•  Ka era kaya nomu icaba

 E rawa ni dau veilecayaki na ivakarau ni lomana e dua vakauasivi ni vakila na veiveisau e yagona. O na rairai kurabuitaka na kena dau veisau na ivakarau ni lomamu ni oti mada ga nomu vakila na veiveisau e yagomu.

 Ke o veilecayaki ena ivakarau ni lomamu, mo kila tiko ni qori era tiki kece ni bula ni dau yaco na veisau ena wai ni yagoda, nuiqawaqawa, kei na sega ni lomavakacegu. E rawa ni yaga nomu kila qai vulica na sala mo lewa vinaka kina na ivakarau ni lomamu.

 Ka dina me baleta na bula: Ni o se itabagone ena yaga sara ke o kila na sala mo lewa vinaka kina na ivakarau ni lomamu, baleta qori ena vukei iko vakalevu ke veisau na ituvaki ena gauna o sa na uabula kina.

 Veivosaki. E kaya na iVolatabu: “Na itokani dina e loloma ena veigauna,e tacida ena gauna ni rarawa.”​—Vosa Vakaibalebale 17:17.

 “Dua na marama keitou veikilai, au dau okati koya me noqu nei. E dau vakarogoci au vinaka ni keirau veivosaki, e rawarawa tale ga noqu talaucaka vua na lomaqu. E dau marau vakalevu o koya ni donu na noqu rai. Ia ke cala ena tu vakarau me vukei au ena sala vinaka duadua.”​—Yolanda.

 iVakasala: Talaucaka na lomamu vua e dua na itubutubu se dua na uabula o nuitaka. Kua ni tukuna vei ira nomu icaba, de dua era sotava tale tiko ga na ituvaki qori.

 Volavola. E kaya na iVolatabu me baleta na rarawa e bikai Jope voli: “Au na talaucaka noqu rarawa. Au na vakatusa na mosi ni yaloqu!” (Jope 10:1) Dua tale na sala o rawa ni “vakatusa” kina na lomamu, oya na nomu vola sara ga na ka o vakila tiko.

 “Se mani vanua cava au gole kina, au na kauta tiko e dua noqu ivola lailai. Keu sotava e dua na ituvaki e vakararawataki au, au na vola na veika au sotava qori. Na volavola e dau vukei tale ga.”​—Iliana.

 iVakasala: Me dua na ivola mo vakavola kina na ivakarau ni lomamu, na ka e vakavuna na veisau ni ivakarau ni lomamu, kei na ka o cakava kina. Na ka me vakaleweni e salavata kei na ulutaga qo ena rawa ni vukei iko.

 Masu. E kaya na iVolatabu: “Biuta vei Jiova na nomu icolacola bibi, ena tokoni iko o koya. Ena sega vakadua ni laiva me bale na yalododonu.”​—Same 55:22.

 “Au dau masu wasoma vei Jiova ena gauna au rarawa kina. Dua na ka noqu lomavakacegu niu talaucaka na lomaqu vua.”​—Jasmine.

 iVakasala: Vakasamataka e tolu na ka o rawa ni vakavinavinakataka ena nomu bula se mani vakacava na ituvaki dredre o sotava. Ni o masu vei Jiova, kerea nona veivuke qai vakavinavinakataki koya ena veivakalougatataki o sotava.