RA TAROGA NA ITABAGONE
Na Cava Meu Cakava Meu Kua Kina ni Oca Sivia?
Ke o nanuma ni o rawa ni oca sivia, ena vukei iko na ulutaga qo!
Vuna e yaco kina
Sivia na ka e namaki. E kaya e dua na goneyalewa o Julie: “E dau tukuni me vinaka cake tiko ga na ivakarau ni noda cakacaka, me kua ni lutu na kena ivakatagedegede, meda sasagataka tiko ga na isausau lelevu kei na rawaka. Sa dredre dina ni sivia na ka e namaki vei keda!”
iYaya Vovou Vakalivaliva. Na talevoni, tablet, kei na so tale na iyaya vovou vakalivaliva sa vakarawarawataka sara ga na veitaratara. Na levu ni gauna eda vakayagataka ena iyaya va qori e rawa ni vakavuna na lomaocaoca, ni toso na gauna sa na tatara mai na oca sivia.
Lailai na moce. E kaya e dua na goneyalewa o Miranda: “E levu na itabagone era dau yadra vakamataka ra qai yadra sivia ena vuku ni vuli, cakacaka, kei na ka ni veivakamarautaki. Era dau sotava kina na leqa, ia era sega ni kila mera walia vakacava.” Na nodra ivakarau ga ni bula e vakavuna nodra oca sivia.
Vuna mo kauai kina
Era vakacaucautaki ena iVolatabu o ira era mamakutu. (Vosa Vakaibalebale 6:6-8; Roma 12:11) Ia e sega ni kena ibalebale qori meda bobula ina cakacaka, qai vakawaleni na veika tale eso wili kina na noda bula.
“Dua na gauna au sega ni kana ena dua taucoko na siga, ni levu na itavi au ciqoma au qai saga meu cakava kece. Au vulica kina ni sega ni vinaka meda dau ciqoma na itavi kece ga e lesi vei keda, vakabibi ke na vakaleqa noda bula.”—Ashley.
Sa rauta me kaya na iVolatabu ni “vinaka sara na koli bula mai na laione mate.” (Dauvunau 9:4) O na rairai bole mo cakava kece ga na ka ni o nanuma o kaukaua me vaka na laione. Ia ena oti koso mai na kaukaua qori ni o sa oca sivia, e rawa ni vakaleqa sara na nomu bula.
Ka o rawa ni cakava
Vakasega ena so na gauna. E kaya na iVolatabu: “Era vuku na yalomalumalumu.” (Vosa Vakaibalebale 11:2) O ira na yalomalumalumu era kila ni vakaiyalayala ga na ka era cakava. Era na sega ni cakava na ka era kila nira na sega ni rawata.
“E rawarawa sara me oca sivia o koya e dau dredre me vakasega, e via cakava na ka kece e tukuni vua. Qori e sega ni ivakaraitaki ni yalomalumalumu. Dua ga na gauna ena qai tatara mai kina na oca sivia.”—Jordan.
Vakacegu vinaka. E kaya na iVolatabu: “E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.” (Dauvunau 4:6) E dau tukuni ni “kakana ni mona” na moce. E dodonu me walu ina tini na aua nodra moce na itabagone e veibogi, ia e levu e sega ni va qori nodra gauna ni moce.
“E dau lailai noqu moce ke levu noqu osooso. Ia eso na gauna e dau vinakati ga na moce meu rawa niu cakava vinaka qai marautaka noqu cakacaka ena siga tarava.”—Brooklyn.
Tuvatuvanaki matau. E kaya na iVolatabu: “Na lalawa ni tamata gumatua ena tini vinaka ga.” (Vosa Vakaibalebale 21:5) Ni o wasea vinaka nomu gauna kei na veika mo cakava, o na vakila na kena yaga ena nomu bula taucoko.
“Ena sega soti na lomaocaoca ke tiko e dua na ituvatuva. Ni tuvanaki vinaka na nomu cakacaka, o na kila na veiveisau mo cakava mo kua kina ni oca sivia.”—Vanessa.
Rawa ni o Wilika Tale ga
RA TAROGA NA ITABAGONE
Au na Vakayagataka Vinaka Vakacava Noqu Gauna?
Lima na vakatutu me kua ni vakamaumautaki kina na gauna e rawa ni caka kina na ka e yaga.
KA ERA KAYA NOMU ICABA
Ka Era Kaya na iTabagone me Baleta na Lokuyara
Rogoca na ka era kaya eso na itabagone me baleta na ca ni lokuyara, kei na yaga ni nodra vakayagataka vinaka nodra gauna.
DROINI YAVALA
E Lewai Iko na iYaya Vakalivaliva?
O bula ena gauna e vakayagataki vakalevu kina na Internet, ia me kua ni lewai iko na iyaya vakalivaliva. O na kila vakacava ni o sa bobula kina? Ke vakaleqai iko, na cava mo cakava me kua ni lewai iko?
