RA TAROGA NA ITABAGONE

Cava Meu Cakava ke Vakararawataki Au Noqu iTokani?

SARAVA/ROGOCA

Ka mo kila

Eda dau sotava kece na leqa. Na ivalavala ca e rawa ni vakavuna nona vakararawataki iko ena ka e cakava se kaya, na nomu itokani vinaka se dua o nanuma ni drau veitokani dredre. O ivalavala ca tale ga o iko. Vakacava o se nanuma tiko na gauna o vakararawataka kina e dua?—Jemesa 3:2.
Vakamosi yalo na ka e raici ena Internet. Kena ivakaraitaki, e kaya e dua na itabagone o David: “Ni o raica ena internet na itaba ni soqo e gole kina nomu itokani, o na rairai veinanuyaka se cava o sega ni sureti kina. Qori e rawa ni vakavuna mo rarawa se nanuma ni o liumuritaki.”
Saga mo kila na vu ni leqa.

Ka o rawa ni cakava

Dikevi iko. E kaya na iVolatabu: “Mo kua ni cudru totolo, ni . . . cudru e ivakatakilakila ni lialia.”—Dauvunau 7:9, ivakamacala e ra.

“Eso na gauna o na qai liaca e muri ni sega sara ga na betena na ka o rarawataka.”—Alyssa.

Vakasamataka mada: O dau kauaitaka vakasivia na ka? Vakacava o rawa ni saga mo dau vosota nodra cala eso tale?—Dauvunau 7:21, 22.

Raica mada na yaga ni veivosoti. E kaya na iVolatabu ni ‘nomu raibaleta na cala e kemu idivi.’—Vosa Vakaibalebale 19:11.

“Ke donu mada ga na ka o cudruvaka, e vinaka mo veivosoti vakarawarawa, kena ibalebale o na sega ni weroka na nona cala e dua qai namaka me kere veivosoti ena gauna kece o ceuta tale mai kina na ka e cakava. Ni o sa veivosoti, guilecava tale ga na ka e yaco.”—Mallory.

Vakasamataka mada: E vakacava sara mada na ca ni ka e vakayacori? O rawa ni veivosoti me vinaka tiko ga kina na veimaliwai?—Kolosa 3:13.

Nomu weroka na leqa kece drau sotava kei na nomu itokani, e vaka ga nomu vuki dolava na katuba me curu na cagi batabata ina rumu sa bau katakataka toka

Kua ni nanumi iko ga. E kaya na iVolatabu mo ‘kua ni kauitaka ga na ka e baleti iko, kauaitaka tale ga na ka e baleti ira tale eso.’—Filipai 2:4.

“Ni drau veilomani qai veidokai kei na nomu itokani, o na saga mo walia totolo na leqa ni o vakamareqeta nomudrau veitokani. Levu na ka o cakava mo drau veitokani rawa kina, o sega ni vinakata e dua na ka me vakacacana.”—Nicole.

Vakasamataka mada: Vakacava e donu na ka e kaya o nomu itokani qai dodonu mo kauaitaka nona rai?—Filipai 2:3.

Bibi me nanumi: E bibi mo kila na ka mo cakava ni o vakararawataki, ena yaga vakalevu qori ni o sa uabula. Vakatovotovotaka sara ga qori ena gauna qo.