E vakamacalataki ena itukutuku e vakarautaka na U.S. Centers for Disease Control and Prevention, ni voleka ni veimama na gone era yabaki 15 ina 19 era dau vakayagataka na gusudra ena yago tabu. E kaya o Sharlene Azam, e vola na ivola Oral Sex Is the New Goodnight Kiss, “Ke o veitalanoa kei ira na itabagone [me baleta na vakayagataki ni gusu ena yago tabu] era na kaya vei iko ni sega ni cala. Era sega ni okata qori me veiyacovi.”

•  Cava o nanuma?

•  Cava na kena dina?

•  Cava mo kauai kina?

 Sauma na taro qo ena io se sega.

1.   E rawa ni bukete e dua na goneyalewa ke veiyacovi ni vakayagataki na gusu ena yago tabu?

   1.   Io

   2.   Sega

2.   E rawa ni vakavuna na tauvimate?

   1.   Io

   2.   Sega

3.   E okati me veiyacovi na vakayagataki ni gusu ena yago tabu?

   1.   Io

   2.   Sega

 Veidutaitaka nomu isaunitaro kei na kena e toka e ra.

1.   E rawa ni bukete e dua na goneyalewa ke veiyacovi ni vakayagataki na gusu ena yago tabu?

    Kena isau: Sega, oya na vuna era kaya kina e levu ni sega ni cala na vakayagataki ni gusu ena yago tabu.

2.   E rawa ni vakavuna na tauvimate?

    Kena isau: Io. O koya e dau vakayagataka na gusu ena yago tabu e rawa ni tauvi koya na mateniyate (hepatitis A se B), vuvuce na yagona tabu, tona, bobota na yagona, tauvi koya na manumanu e vakavuna na AIDS (HIV), kei na sifilisi.

3.   E okati me veiyacovi na vakayagataki ni gusu ena yago tabu?

    Kena isau: Io. E wili me veiyacovi na ivalavala e caka ena yagona tabu e dua, me vaka na veiyacovi, vakayagataki ni gusu ena yago tabu, ena sala ni valelailai, kei na vakatavevele.

 Wilika e vica na tikinivolatabu e salavata kei na ulutaga qo.

 E kaya na iVolatabu: “E loma ni Kalou qo . . . moni vakatabui kemuni mai na veiyacovi tawadodonu.”​—1 Cesalonaika 4:​3.

 Na vosa taumada e vakadewataki me “veiyacovi tawadodonu” e dusia na ivalavala kece ni veitaleitaki ena taudaku ni vakawati, wili kina na veiyacovi, na vakayagataki ni gusu kei na sala ni valelailai ena veiyacovi, kei na vakatavevele. O koya e veiyacovi tawadodonu ena vakila na revurevu ni ka e cakava, na kena e rarawataki sara ni vakaleqa nona veiwekani kei na Kalou.​—1 Pita 3:12.

 E kaya na iVolatabu: “O koya e veiyacovi tawadodonu sa valavala ca sara tiko ga e yagona.”​—1 Korinica 6:18.

 E veivakaleqai vakayago, vakayalo tale ga na iwalewale ni veiyacovi qo. Ena vakamawe tu e lomamu. E kaya na ivola Talking Sex With Your Kids: “E sega ni vou ena veiyacovi na vakilai ni rarawa, veivutuni, se nomu vakayagataki. Ena vakila kece qori e dua ni veiyacovi tawadodonu.”

 E kaya na iVolatabu: “O yau o Jiova na nomu Kalou, o koya e vakavulici iko mo vinaka kina.”​—Aisea 48:​17.

 O vakadinata ni yaga vei iko na lawa ni Kalou me baleta na veiyacovi? Se o nanuma ni yalana nomu galala? Mo sauma na taro qori, vakasamataka mada e dua na gaunisala osooso e tu kina na iyalayala ni siviti, na cina, kei na ivakatakilakila ni wawa. O raica vakacava na ivakatakilakila qori? O raica ni yalana nomu galala se itataqomaki? Na cava ena yaco ke o vakalecalecava qori vaka kina o ira na vo ni draiva?

 E va sara ga qori na ivakatagedegede ni Kalou. Ke o vakalecalecava o na tamusuka dina ga na ka o kaburaka. (Kalatia 6:7) E kaya na ivola Sex Smart: “Na levu ga ni nomu vakawalena nomu vakabauta kei na ivakavuvuli mo vakayacora na ka o kila ni cala, ena lailai nomu dokai iko.” Ia ke o bulataka na ivakatagedegede ni Kalou, ena vinaka na nomu itovo. Koya e bibi sara ni na savasava nomu lewaeloma.​—1 Pita 3:16.