•  “Noqu itokani vinaka duadua, ia e kequ meca tale ga”

•  Rua na vuna mo veiyaloni kina

•  Ka era kaya nomu icaba

Ratou nomu itokani vinaka duadua na tacimu, ia rawa tale ga ni ratou kemu meca. Dua na ka nomudou dau veilomani, ia so na gauna ratou na vakacudrui iko sara ga. E kaya o Helena e yabaki 18: “E dau vakacudrui au sara ga o taciqu, e kila vinaka na ka me tukuna se cakava meu katakata kina!”

E rawa ni wali eso na veileqaleqati vakaveitacini ke rawarawa ga nomudou veitalanoa qai veivosakitaka vakavinaka. Kena ivakaraitaki:

• Rau veibataka na veitacini tagane na rumu rau vakayagataka tiko ke dua vei rau e via tiko taudua kina. Ia ena wali na leqa qori ke rau dau veirogorogoci, rau qai kauaitaka tale ga na ka rau dui vinakata vakaveitacini. Me muri tale ga na ivakavuvuli vakaivolatabu ena Luke 6:​31.

• Rau daramaki i sulu na veitacini yalewa qai sega ni rau dui kerea. Ena wali na leqa qori ke rau veivosaki vakavinaka, qai biuta na iyalayala ni ka rau rawa ni cakava. Me muri tale ga na ivakavuvuli vakaivolatabu ena 2 Timoci 2:​24.

Ia eso na ituvaki e ca sara, rawa tale ga ni sotavi kina e levu na leqa. Dikeva mada ena iVolatabu e rua na kena ivakaraitaki:

• E tini ena leqa nodrau vuvutaki Mosese na tacina o Miriama kei Eroni. Wilika na Tiko Voli Mai na Lekutu 12:​1-​15. Tarogi iko mada: ‘E rawa vakacava meu kua ni vuvutaki ratou na taciqu?’

• Na levu ni nona cudru o Keni e vakamatei Epeli na tacina. Wilika na Vakatekivu 4:​1-​12. Tarogi iko mada: ‘Au na lewa vinaka vakacava noqu cudru niu veivosaki kei ratou na taciqu?’

Se mani dredre vakacava nomu saga mo veiyaloni kei ratou na tacimu, e rua na vuna ena yaga kina nomu sasaga.

1. iVakatakilakila ni yalomatua. E kaya o Alex: “E dau totolo noqu cudruvi rau na taciqu yalewa. Ia qo au sa sega ni yalototolo au sa dau vosoti rau ga. Au rawa ni kaya niu sa yalomatua.”

   E kaya na iVolatabu: “O koya e berabera ni cudru e yalomatua vakalevu, ia o koya e yalototolo e vakaraitaka na nona lialia.”​—Vosa Vakaibalebale 14:⁠29.

2. Ena yaga ni o sa uabula. Ke o sega ni vosota rawa nodratou ivalavala na tacimu, ena qai dredre sara ni o veimaliwai kei watimu, dua drau cakacaka vata, nomu boso, se dua tale ni yaco na ituvaki va qori.

   Ka dina: Ena vakatau na vinaka ni nomu bula mai muri ena ivakarau ni nomu veivosaki kei na ka o cakava mo walia kina na leqa. Na vanua vinaka o rawa ni vakatovotovotaka kina qori vei ratou e vale.

   E kaya na iVolatabu: “Ke rawa, saga moni veiyaloni kei ira na tamata kece.”​—Roma 12:⁠18.

Vakacava o vinakata mo vukei ratou na tacimu na kena wali na leqa ena kemudou maliwa? Wilika “Ka era kaya nomu icaba,” qai raica na ka me vakaleweni, “Veiyaloni kei Ratou na Tacimu.”