De dua o sa taleitaka tiko e dua na tagane ke o yalewa se yalewa ke o tagane. Drau dau vakauitukutuku vakalevu, e levu na gauna drau na toka vata ga ke caka e dua na soqo, eso na itukutuku drau dau vakauta e rawa ni vakaraitaka na wede. O na rairai nanuma, qori e vakaraitaka na dodomo.

 O nanuma sara mo tarogi koya o domona me baleta na nomudrau veimaliwai, me o vakadeitaka ke va tale ga ya nona rai. Ia e kaya ni dau raici iko tu ga me dua nona itokani.

•  Ka o vakila

•  Vuna e yaco kina

•  Ka o rawa ni cakava

 “Au sevaki koya qai dua na ka noqu sevaki au mada ga! Ni levu na gauna keirau dau vakauitukutuku, au raica ni dau kauaitaki au tale ga. Tekivu meu taleitaki koya.”​—Jasmine.

 “Keirau dau veitomani kei na dua na yalewa ena nodrau veibuku voli e dua noqu itokani kei nona itau. Ena so na gauna e vaka ga keirau veidomoni tale tiko kei na yalewa qori. Keirau dau veivosaki qai vakauitukutuku vakalevu ena talevoni. Au sega sara ni vakabauta ni tukuna ni dau raici au tu ga meu dua na itokani e veibuku tiko kei na dua tale.”​—Richard.

 “E dau vakauitukutuku mai e veisiga e dua na tagane, so na gauna ena laurai ena itukutuku qori na ‘wede.’ Ia niu tukuna vua na noqu rai me baleti koya, e dredre qai kaya ni sega ni via vakaitau. Dua na ka na noqu rarawa.”​—Tamara.

 Bibi me nanumi: Ke o nanuma ni o taleitaka tiko e dua, ia o qai kila ni sega ni duavata kei iko ena rawa sara ga ni vakavuna mo cudru, madua, o nanuma tale ga ni o nakicataki. Ke yaco qori, o sega ni o vakila duadua ga. E kaya e dua na itabagone o Steven: “Dua na ka noqu rarawa niu qai kila na ka e yaco, e vaka ga e ramusu na lomaqu. E taura e dua na gauna balavu meu qai rawa ni nuitaka e dua.”

 Na tabana ni itukutuku kei na vakau ni itukutuku e rawarawa ni vakavurea eso na yalo mo domona kina e dua, ia o koya o domona qori ena rairai sega ni taleitaki iko. Dikeva mada na ka era kaya eso na itabagone.

 “Eso era vakauitukutuku mera vakaogai ira tu ga, ia kua ni nanuma ni sa domoni iko tiko. Ke vakau itukutuku yani e veisiga, o na vakacalai ke o nanuma ni kauaitaki iko vakatabakidua.”​—Jennifer.

 “Ena rairai nanuma e dua ni sa veidomoni tiko, ia ena yasana adua o koya o rairai domona ena nanuma mo drau veivosaki ga me rawa ni vakauqeti koya.”​—James.

 “Na itukutuku lalai me vaka na ‘sota tale’ ena rawa ni nanumi ni o veidomoni, ia ni vakau na itukutuku vata ga qori ena talevoni ena rairai ‘veisiwati’ toka me vaka era dau cakava na dauvolivolitaki.”​—Hailey.

 “Na ivakatakilakila ni matadredredre ena rawa ni vakaibalebaletaka ni o kauai, de dua o wede tale ga. Ia vua e taura na itukutuku qori ena rawa ni vakaibalebaletaka ni o wede tiko.”​—Alicia.

 Bibi me nanumi: Kua ni vakacalai ena nona kauai e dua me dodomo.

 Ena rawarawa wale tu ga na kena tukuni! Ni kaya na iVolatabu: “E dau veivakaisini duadua . . . na loma ni tamata qai rerevaki.” (Jeremaia 17:9) Na veidomoni o bucina e vaka na vale e tara ena nuku, ni rawarawa na kena karusa ena gauna o siqema kina ni ka ni tadra wale ga qori.

•   Vakasamataka vakavinaka. Taura na gauna mo dikeva vakavinaka na veimaliwai o bucina kei koya o domona. Tarogi iko, ‘Vakacava nona ivakarau ni veimaliwai kei ira eso tale?’ Qarauna na nomu “vakasama,”me kua ni rawai totolo ena ka e vinakata na lomamu.​—Roma 12:1.

•   Veidutaitaka na ka. Na ivakatakilakila kece e vakaraitaka o koya e domoni iko, dikeva na ivakatakilakila e dusia ni sega ni ganiti iko. Sega ni tukuni ni o taleitaka ga e dua kena ibalebale ni drau sa veidomoni.

•   Vosovoso. Ena vinakati na vosovoso mo kua ni rawai totolo ena veimaliwai o sa bucina, vakavo ke vakaraitaka sara ga o koya o domona ni taleitaki iko qai vinakata mo drau veikilai.

•   Dau dina. E kaya na iVolatabu ni tiko na “gauna ni vosa.” (Dauvunau 3:7) Ke o via kila na dodomo dina e vakaraitaka e dua drau veitokani voleka, e vinaka mo veivosaki kei koya. E kaya e dua na goneyalewa o Valerie: “E vinaka mo rarawa qo ke tukuni ni sega ni domoni iko, e ca ke sa vakavula nomudrau veidomoni o qai liaca ni sega dina ga ni domoni iko ena imatai ni gauna.”

 Bibi me nanumi: E kaya na Vosa Vakaibalebale 4: 23: “Mo taqomaka na lomamu.” Ke o kila ni o domona tiko e dua, saga mo kila ke domoni iko tale ga. Nomu vakalaiva me dei nomudrau veidomoni e vaka na nomu saga me bula e dua na kau ena vanua vatuvatu.

 Ke o kila ni domoni iko tiko e dua, o sa yalomatua qai rawa ni veibuku, ena vakatau sara ga vei iko na nomudrau veimaliwai. Mo nanuma tiko na dei ni nodrau vakawati e dua na tagane kei na yalewa, oya ni tautauvata na nodrau isausau vakayalo, rau doudou, qai daudina. (1 Korinica 7:​39) Io e tekivu ga ena nodrau veitokani vinaka.​—Vosa Vakaibalebale 5:​18.