Sega. E vakamatatataka na iVolatabu ni buli keda na Kalou, wili kina na “veimataqali” manumanu kei na kau kece era bula. a (Vakatekivu 1:12, 21, 25, 27; Vakatakila 4:11) E kaya tale ga nida kawa i Atama kei Ivi na imatai ni noda itubutubu. (Vakatekivu 3:20; 4:1) E sega ni duavata na iVolatabu kei na ivakavuvuli na theistic evolution, se nona vakayagataka na bula vakaidewadewa na Kalou me bulia kina eso tale na kabula. Ia e duavata kei na nodra vakadidike na saenitisi ni levu tu na veimataqali kabula. b

•  E vakayagataka na Kalou na bula vakaidewadewa?

•  E duavata na bula vakaidewadewa kei na iVolatabu?

•  Vakacava na veiveisau ni kau kei na manumanu me rawa ni bula kina?

 Na vosa “theistic evolution” e levu na kena ibalebale. E kaya na ivola na Encyclopædia Britannica, na vosa qori e laurai kina “na veiveisau ni kabula e dua na ka e talei kina na kabuli kece e bulia na Kalou.”

 E yavutaki na theistic evolution ena vakasama ni:

•   Kabula kece e vu mai ena dua na vanua makawa sara.

•   Rawa ni veisau e dua na kena mataqali ina duatani tale na mataqali kabula.

•   qori e nona cakacaka na Kalou.

 Na vakasama ni theistic evolution e vakaraitaka ni lasutaki na itukutuku ni ibulibuli e volai ena Vakatekivu. Ia e vakaraitaka o Jisu ni yaco dina na veika e volatukutukutaki kina. (Vakatekivu 1:26, 27; 2:18-24; Maciu 19:4-6) E kaya mada ga na iVolatabu ni bera ni bula e vuravura o Jisu, a bula tu mai lomalagi kei na Kalou, e veivuke tale ga ena kena buli “na ka kece.” (Joni 1:3) Kena ibalebale, e sega ni duavata kei na ivakavuvuli vakaivolatabu nona vakayagataka na Kalou na bula vakaidewadewa me buli tale kina eso tale na kabula.

 E sega ni vakamacalataka na iVolatabu na veiveisau e rawa ni yaco ina dua na kabula. E sega tale ga ni vakacala na rai ni dau veiveisau na veimataqali manumanu kei na kau me ganita na vanua e bula kina. Ia eso era raica na veiveisau qori me dua na yavu ni bula vakaidewadewa, sega ni dua na kabula vou.