Io. Ena yaga vei iko e va na ivakavuvuli vakaivolatabu qo mo walia kina leqa vakailavo kei na dinau:

1.   Lalawataka na ka mo vakayagataka. “Na lalawa ni tamata gugumatua ena tini vinaka ga, ia o ira kece era vakusakusa era na dravudravua.” (Vosa Vakaibalebale 21:5) Kua ni vakusakusa mo volia e dua na ka baleta ga ni lutusobu. Me dua nomu ituvatuva ni ilavo qai dei kina.

2.   Kua ni dinau vakaveitalia. “Na daukerekere e bobula vei koya e solia vua na ka.” (Vosa Vakaibalebale 22:7) Ke o sega ni sauma rawa nomu dinau, saga mo veivosaki kei koya e soli dinau. Sasaga tiko ga. Vakaraitaka na ivakarau ni rai nei koya e tukuni ena Vosa Vakaibalebale 6:1-5: ‘Vakamalumalumutaki iko, vakamasuti koya na kainomu. Kua ni solia me moce na matamu, se sosovu na dakudaku ni matamu.’ (Vosa Vakaibalebale 6:1-5) Ke sega ni rogoci na imatai ni nomu kerekere, sasaga tiko ga.

3.   Rai donu me baleta na ilavo. “Kua ni nanumi iko ga mo via vutuniyau​—o na sega ni kila na vanua ena tini kina.” (Vosa Vakaibalebale 28:22, Contemporary English Version) E sega wale ga ni vakaleqai keda vakailavo na vuvu kei na kocokoco, ena vakaleqai keda tale ga vakayalo.

4.   Lomavakacegu. ‘Ke sa tiko na kakana, na isulu, meda lomavakacegu ena veika qo.’ (1 Timoci 6:8) E sega ni vakatau ena ilavo na noda marau se lomavakacegu. Eso era tiko ena vuravura qo era mamarau, ia e sega ni levu na nodra ilavo. Era marau nira kauaitaka na nodra vuvale, itokani, kei na nodra veiwekani kei na Kalou.​—Vosa Vakaibalebale 15:17; 1 Pita 5:6, 7.