Na veitokani ena rawa ni vukei keda meda marau, me vinaka tale ga na noda bula. Na itokani vinaka ena vukei keda me vinaka na noda itovo, da qai vakavinakataka tiko ga.—Vosa Vakaibalebale 27:17.

 Ia e vakabibitaka na iVolatabu meda digi ira vinaka na noda itokani. E vakasalataki keda tale ga ena ka ena yaco ke da digia cala na noda itokani. (Vosa Vakaibalebale 13:20; 1 Korinica 15:33) Na itokani va qori e rawa ni vakavuna me vakatulewa cala kina e dua, se vakaleqa nona itovo vinaka.

Ena ulutaga qo

•  Rawa vakacava ni dua e itokani vinaka?

•  Vakacava e tiko ena iVolatabu eso na ivakaraitaki vinaka ni veitokani?

•  Rawa ni dua e itokani ni Kalou?

•  Tikinivolatabu ni veitokani

 E kaya na iVolatabu na veitokani vinaka e sega ni yavutaki ga ena ka drau taleitaka vata, ia e yavutaki ena dua na ka e bibi sara. Kena ivakaraitaki, e kaya na Same 119:63: “Au nodra itokani kece na rerevaki kemuni a o ira tale ga na muria na nomuni ivakaro.” O koya e vola na tikinivolatabu qori e digia na itokani era vakamarautaka na Kalou, ra qai muria nona ivakatagedegede.

 E kaya tale ga na iVolatabu na itovo e dodonu me vakaraitaka na itokani vinaka. Kena ivakaraitaki:

•   “Na itokani dina e loloma ena veigauna, e tacida ena gauna ni rarawa.”—Vosa Vakaibalebale 17:17.

•   “E tiko na itokani era via veivakaleqai, ia e tiko na itokani eda veivolekati sara, e yawa na tacida dina.”—Vosa Vakaibalebale 18:24.

 Eda vulica ena rua na tikinivolatabu qori ni itokani vinaka ena dau yalodina, loloma, veikauaitaki, qai lomasavu. Eda rawa ni nuitaka nodra veivuke se mani tuvaki cava eda sotava. Na itokani dina tale ga era na veivakasalataki ke da muria tiko na sala cala, se da vakarau cakava e dua na vakatulewa cala.—Vosa Vakaibalebale 27:6, 9.

 Io. E tiko ena iVolatabu na ivakaraitaki ni veitokani vinaka e duidui nodra yabaki, isususu, itovo vakavanua kei na itutu vakaveiliutaki. Raica mada qo e tolu na kena ivakaraitaki.

•   Ruci kei Neomai. O Ruci na vugoi Neomai, e sega ni tautauvata na nodrau yabaki ni bula. E duidui tale ga na nodrau isususu. Ia rau veivolekati qai dei nodrau veitokani.—Ruci 1:16.

•   Tevita kei Jonacani. O Jonacani e qase vei Tevita ena 30 na yabaki. Ia e kaya na iVolatabu ni rau “veitokani voleka” o Tevita kei Jonacani.—1 Samuela 18:1.

•   Jisu kei ratou nona yapositolo. O Jisu e nodratou qasenivuli nona yapositolo, e tu gona vua na lewa. (Joni 13:13) Ia e sega ni okati ratou me ratou tawayaga. E veitokani voleka ga o Jisu kei ira era muria nona ivakavuvuli. E kaya kina me baleti ratou nona yapositolo: “Au sa kacivi kemudou mo dou noqu itokani, baleta na ka kece au rogoca vei Tamaqu au vakatakila vei kemudou.”—Joni 15:14, 15.

 Io, e rawa nida veitokani kei na Kalou. E kaya na iVolatabu: “E veitokani voleka kei ira na yalododonu.” (Vosa Vakaibalebale 3:32) Kena ibalebale, na Kalou ena veitokani ga kei ira era dau dina, itovo vinaka, veidokai, ra qai muria na nona ivakatagedegede ena ka e dodonu kei na ka e cala. Kena ivakaraitaki, na turaga yalodina o Eparama e vakatokai ena iVolatabu me nona itokani na Kalou.—2 Veigauna 20:7; Aisea 41:8; Jemesa 2:23.