E tukuni ena iVolatabu ni o Jisu a ‘vakamatei ena yago vakayago, ia e qai vakabulai [vakaturi] ena yago vakayalo.’—1 Pita 3:18; Cakacaka 13:34; 1 Korinica 15:45; 2 Korinica 5:16.

 E tukuna sara mada ga o Jisu ni na sega ni vakaturi o koya ena yago vakayago. E kaya ni na “solia na [lewena] . . . me bula kina o vuravura,” me kedra ivoli na kawatamata. (Joni 6:51; Maciu 20:28) Ke vakaturi ena yago vakayago, sa na sega ni yaga na ivoli. Ia e sega ni rawa ni yaco qori, ni sa tukuni tu ena iVolatabu ni cabora “ga vakadua” o koya na yagona kei na nona dra.—Iperiu 9:11, 12.

Ke a vakaturi o Jisu ena yago vakayalo, ratou qai raici koya ga vakacava na nona tisaipeli?

•  E rawa nira veisau me tamata na veika bula vakayalo. Kena ivakaraitaki, o ira mada ga na agilosi ena veigauna sa oti era kana, ra gunu kei ira na tamata. (Vakatekivu 18:1-8; 19:1-3) Ia era se ka bula tiko ga vakayalo, era rawa ni lesu tale ina nodra itikotiko vakayalo.—Dauveilewai 13:15-21.

•  Ni vakaturi oti o Jisu a rairai vakatamata ena dua na gauna lekaleka, vakataki ira ga na agilosi ena gauna ya. A rawa ni veisautaki koya ni ka bula vakayalo. (Luke 24:31; Joni 20:19, 26) Na yago e rairai kina o Jisu e duidui mai na kena e laurai kina ena dua tale na gauna. O ira mada ga na nona itokani voleka era kilai koya ena ka e tukuna se na ka e cakava.—Luke 24:30, 31, 35; Joni 20:14-16; 21:6, 7.

•  A vakatitiqataka na yapositolo o Tomasi na vakaturi i Jisu, mani rairai vua o Jisu ena yago e laurai kina na mawe ni mavoa me vakadeitaka na nona vakabauta.​—Joni 20:24-29.