E Tiko e Lomada na Matanitu ni Kalou?
Kena isau Vakaivolatabu
Sega. Na Matanitu ni Kalou e sega ni dua na ituvaki e tiko e lomada na lotu vaKarisito a. E vakaraitaka na iVolatabu na vanua dina e tiko kina ni vakatoka me “matanitu vakalomalagi.” (Maciu 4:17, Ai Volatabu) Raica mada na ka e vakaraitaka na iVolatabu, ni qo e dua dina na matanitu e veiliutaki tiko mai lomalagi.
E tiko o ira na veiliutaki ena Matanitu ni Kalou, o ira na vakarurugi kina, na kena lawa, kei na kena ivakaro me vakayacora na loma ni Kalou mai lomalagi kei vuravura.—Maciu 6:10; Vakatakila 5:10.
Na Matanitu ni Kalou ena liutaki ira na “lewe ni veivanua, na veimatatamata, kei na duivosavosa” e vuravura. () Na lewa ni veiliutaki e sega ni vakatau vei ira na lewenivanua, ia e lako vakadodonu mai vua na Kalou.—Same 2:4-6; Aisea 9:7.
E tukuna o Jisu vei ratou nona yapositolo yalodina ni ratou na tomani koya ena Matanitu vakalomalagi me ratou “dabe ena idabedabe vakatui.”—Luke 22:28, 30.
E tiko na meca ni Matanitu ni Kalou, ena qai vakarusa gona na Matanitu qo.—Same 2:1, 2, 8, 9; 110:1, 2; 1 Korinica 15:25, 26.
E sega ni kaya na iVolatabu ni Matanitu vakalomalagi e tiko e lomada, oya me veiliutaki tiko e lomada. Ia e tukuna ga ni dodonu me uqeta na lomada na “vosa ni Matanitu” se na ‘itukutuku vinaka ni Matanitu ni Kalou.’—Maciu 13:19; 24:14.
Na cava na kena ibalebale ni “tu e na lomamudou na matanitu ni Kalou”?
Eso e sega ni matata vei ira na vanua e tiko kina na Matanitu ni Kalou nira wilika na Luke 17:21 ena so na vakadewa ni iVolatabu. Me kena ivakaraitaki, e tukuna na Ai Volatabu ni “tu e na lomamudou na matanitu ni Kalou.” Me matata vei keda na tikina qo, meda raica mada na tikina wavolita
.
A sega ni tiko na Matanitu ni Kalou e lomadra na dau vakadrecike kei na daulaba era saqati Jisu
E vosa tiko o Jisu vei ira na Farisi, na ilawalawa era lewena na iliuliu ni lotu era saqati koya ra qai bosea mera vakamatei koya. (Maciu 12:14; Luke 17:20) Vakacava, ena vakaibalebale ke tukuni ni Matanitu ni Kalou e dua dina na ituvaki e tiko e lomadra na dau vakadrecike qo? E tukuna vei ira o Jisu: ‘E sinai e lomamudou na veivakaisini kei na ivalavala tawadodonu.’?—Maciu 23:27, 28.
Eso tale na vakadewa e vakamacalataka donu na vosa i Jisu ena Luke 17:21: “Na Matanitu ni Kalou sa tiko vata qo kei kemudou.” (Neitou na matanivola kata; Contemporary English Version) “Ni sa tiko maliwai kemudou na Matanitu ni Kalou.” (New World Translation) A “tiko vata” se “maliwai” ira na Farisi na Matanitu vakalomalagi, oya ni duri tu e matadra o Jisu, o koya e digitaka na Kalou me Tui.—Luke 1:32, 33.
a Era vakavulica e levu na lotu ni Matanitu ni Kalou e tiko e lomada. Me kena ivakaraitaki, e vakamacalataka na lotu Southern Baptist Convention mai Merika, ni tiki ni Matanitu ni Kalou oya “na veiliutaki ni Kalou e lomada kei na noda bula.” E tautauvata tale ga qori kei na ka e tukuna o Pope Benedict XVI ena nona ivola na Jesus of Nazareth, ni “Matanitu ni Kalou ena yaco mai ni talairawarawa na lomana e dua.”
Rawa ni o Wilika Tale ga
ESSENTIAL BIBLE TEACHINGS
Na Cava na Matanitu ni Kalou?
Ena cakacaka vakaitalatala i Jisu, e dau vakabibitaka na Matanitu ni Kalou. Sa balavu nodra masulaka tiko na nona imuri me yaco mai na Matanitu qori.
VAKAMACALATAKI NA TIKINIVOLATABU
iVakamacala ni Marika 1:15—“Sa Voleka na Matanitu ni Kalou”
Wilika na Marika 1:15 ena so na kena ivakadewa ena iVolatabu, idusidusi ena iVolatabu kei na ivakamacala ni vosa. Saga mo kila na ibalebale ni tikinivolatabu qo.
NA VALE NI VAKATAWA
O Cei na Tui ni Matanitu ni Kalou?
Na Kalou e uqeti ira e levu na dauvola iVolatabu mera vola se o cei ena Tui ni Matanitu ni Kalou. E laurai ena ivolatukutuku ni kawatamata ni ganiti Jisu Karisito duadua ga na ivakamacala qori.
SAUMI NA TARO VAKAIVOLATABU
Na Cava ena Cakava na Matanitu ni Kalou?
Dikeva na ka meda namaka ni sa veiliutaki na Matanitu ni Kalou e vuravura.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.