Na ivalavala ca e dua na ivalavala, ivakarau ni yalo, se vakasama e veisaqasaqa kei na ivakatagededege ni Kalou. E okati kina noda beca nona lawa nida cakava na ka e tawadodonu e matana. (1 Joni 3:4; 5:17) Na iVolatabu e vakaraitaka ni cakacala?—oya nomu sega ni cakava na ka e donu.​—Jemesa 4:​17.

 Ena vosa a volai taumada kina na iVolatabu, na ibalebale ni vosa “ivalavala ca” e vakaraitaka ni “calati e dua na ivakatakilakila” se dua na takete. Kena ivakaraitaki, e dua na ilawalawa sotia e Isireli era kenadau ena vakayagataki ni irabo era na ‘sega vakadua ni calata’ na takete. Na matavosa qori, ke vakadewataki vakadodonu, e kena ibalebale ni “sega ni ivalavala ca.” (Dauveilewai 20:16) Koya gona nida ivalavala ca eda sa calata kina na ivakatagedegede savasava ni Kalou.

 Ni buli keda na Kalou, e tu vua na dodonu me vakarautaka na ivakatagedegede vei keda na kawatamata. (Vakatakila 4:11) Eda na saumitaro vua ena noda ivalavala.​—Roma 14:12.

E rawa nida saga meda kua ni ivalavala ca?

 Sega. E kaya na iVolatabu ni “valavala ca na tamata kece, qai sega ni yacova rawa na lagilagi ni Kalou.” (Roma 3:23; 1 Tui 8:46; Dauvunau 7:20; 1 Joni 1:8) Na vuna?

 Erau a sega ni ivalavala ca o Atama kei Ivi ena ivakatekivu. Ni rau a buli ena iyaloyalo ni Kalou, erau uasivi. (Vakatekivu 1:27) Ia rau mai vakayalia qori ni rau talaidredre vua na Kalou. (Vakatekivu 3:5, 6, 17-19) Gauna rau vakaluveni kina, rau mani vakadewa na ivalavala ca qori. (Roma 5:12) Me vaka e tukuna o Tui Tevita, “Au beitaki ena cala niu sucu mai.”​—Same 51:5.

Eso na ivalavala ca e bibi sara mai na so tale?

 Io. Kena ivakaraitaki, e kaya na iVolatabu ni o ira na tagane ni Sotoma era ‘daucaka ca, era ivalavala ca torosobu’ qai “sivia nodra ivalavala ca.” (Vakatekivu 13:13; 18:20) Dikeva e tolu na sala e vakaraitaki kina ni ivalavala ca bibi e dua.

1.   Kena ivakatagedegede. E veivakasalataki na iVolatabu meda qarauni keda mai na cala bibi me vaka na veidauci, qaravi matakau, butako, mateni, kocokoco, laba, kei na vakatevoro. (1 Korinica 6:9-11; Vakatekivu 21:8) E vakatauvatana na iVolatabu na ivalavala ca torosobu qori ina vosa se ivalavala e veivakamavoataki. (Vosa Vakaibalebale 12:18; Efeso 4:31, 32) E uqeti keda na iVolatabu meda kua ni vakalecalecava na ivalavala ca, ni rawa ni vakavuna meda beca vakalevu na lawa ni Kalou.​—Maciu 5:​27, 28.

2.   Kena inaki. Eso era valavala ca nira vakawaletaka na ka e vinakata na Kalou. (Cakacaka 17:30; 1 Timoci 1:13) E vakatauvatana na ivalavala ca va qori na iVolatabu ina ivalavala ca e nakiti kina na beci ni lawa ni Kalou. E sega ni vosoti rawa. (Tiko Voli Mai na Lekutu 15:30, 31) Na ivalavala ca e nakiti e vu mai vei ira e ‘ca na lomadra.’​—Jeremaia 16:12.

3.   Kena Wasoma. Na iVolatabu e vakaduiduitaka tale ga na cakacala e caka vakadua kei na kena e yaco veitarataravi. (1 Joni 3:4-8) Era sa mai vulica na iVolatabu eso vei ira na ‘nakita nodra ivalavala ca,’ ia era na lewai vua na Kalou.​—Iperiu 10:26, 27.

 O ira na cala bibi era na vakila na bibi ni nodra ivalavala ca. Kena ivakaraitaki, e vola o Tui Tevita: “Noqu cala sa sivia na uluqu, vaka na icolacola bibi, au sa sega ni colata rawa.” (Same 38:4) Ia e tukuna na iVolatabu: “Me biuta mada na nona itovo na tamata ca, kei na nona vakanananu na tamata ivakarau ca, me lesu vei Jiova ni na lomani koya, vua na noda Kalou, ni na veivosoti vakalevu o koya.”​—Aisea 55:7.