Ni oti nona buli rau na imatai ni tagane kei na yalewa na Kalou, e vakamautaki rau sara. E cakava qori me rau marautaka kina na nodrau bula, wili kina o ira na luvedrau.—Vakatekivu 1:27, 28; 2:18.

 Na Kalou e vinakata mera marau na veiwatini. (Vosa Vakaibalebale 5:18) E vakarautaka ena iVolatabu na ivakatagedegede ni bula vakawati. E tu tale ga kina na ivakavuvuli ena dei kina na vakawati.

Ena ulutaga qo

•  Cava na ivakatagedegede ni Kalou me baleta na vakawati?

•  Vakacava na veibiu kei na veisere?

•  E vinakati me vakalawataki na vakawati me vakadonuya na Kalou?

•  Cava na nodrau itavi na tagane kei na yalewa vakawati e volai ena iVolatabu?

•  E vakaroti ira na veiwatini nikua na Kalou mera vakaluveni?

•  Ena yaga vakacava na iVolatabu ena noqu bula vakawati?

•  Tikinivolatabu me baleta na vakawati

 Ena ivakatekivu e tauyavutaka na Kalou na vakawati me vauci rau vata e dua na tagane, kei na dua na yalewa. (Vakatekivu 2:24) Na Kalou e sega ni vakadonuya e dua me vica vata tu na watina, na veimoceri vakatagane se vakayalewa se me rau tiko vata e dua na tagane kei na yalewa rau sega ni vakamau. (1 Korinica 6:9; 1 Cesalonaika 4:3) O Jisu e vakavulici ira na nona imuri mera talairawarawa ina ivakatagedegede ni Kalou me baleta na vakawati.—Marika 10:6-8.

 Ena rai ni Kalou na vakawati e vauci rau na veiwatini me yacova na mate. Ni rau vakamau e dua na tagane kei na yalewa, rau na yalataka ni rau na yalodina qai sega ni veibiu me yacova na mate.—Marika 10:9.

 E namaka na Kalou me rau muria na veiwatini na nodrau yalayala ni vakawati. Eso na gauna rau na duitutu. Kena ivakaraitaki, ena gole e dua vei rau vei ira na wekana ni yaco e dua na leqa tawanamaki. Ia e sega ni uqeta na iVolatabu me yaco na veibiu ena gauna e dredre kina na bula vakawati. E uqeti rau ga me rau saga tiko ga me rau veiyaloni ni rau sotava na ituvaki dredre.—1 Korinica 7:10.

 Na yavu duadua ga vakaivolatabu e rawa kina na veisere, oya na veibutakoci. (Maciu 19:9) Koya gona, ke sega ni vu ni nodrau veibiu se veisere na veibutakoci, e sega ni vakadonuya na iVolatabu me rau veibuku se vakawati kei na dua tale.—Maciu 5:32; 1 Korinica 7:11.

 E namaka na Kalou mera talairawarawa na lotu vaKarisito ina lawa ni matanitu me baleta na vakawati. (Taito 3:1) Ni rau vakalawataka na nodrau vakamau e dua na veiwatini, e vakaraitaka ni rau talairawarawa vei ira na veiliutaki, rau doka tale ga na rai ni Kalou me dei nodrau vakawati. a

•   Nodrau itavi ruarua. E dodonu me rau veilomani qai veidokai. (Efeso 5:33) E dodonu me rau vakaceguya na nodrau gagadre ni veiyacovi qai kua vakadua ni tawayalodina. (1 Korinica 7:3; Iperiu 13:4) Ke rau vakaluveni e nodrau itavi ruarua na nodra tuberi na gone.—Vosa Vakaibalebale 6:20.

   E sega ni vakamacalataka vakamatailalai na iVolatabu na sala me rau qarava kina na veiwatini na cakacaka saumi kei na itavi e vale. Rau na vakatulewataka sara ga na veiwatini me ganita nodrau vuvale.

•   iTavi nei tagane vakawati. E kaya na iVolatabu ni “ului i watina o tagane.” (Efeso 5:23) Kena ibalebale, o tagane ena dusimaki ratou na lewe ni nona vuvale. Na veika ena vakatulewataka ena yaga vei watina kei ratou na gone.

   Ena vakarautaka na veika me ratou na bulabula kina, marau qai volekata na Kalou. (1 Timoci 5:8) Ena vakaraitaka ni mareqeta na itovo kei na ka e rawata o watina, ena tokoni koya qai doka na nona rai ni vakatulewa. (Vosa Vakaibalebale 31:11, 28) E kaya na iVolatabu ni dodonu me yavutaki ena loloma na sala e qarava kina o tagane vakawati na nona itavi.—Kolosa 3:19.

•   iTavi nei yalewa vakawati. E kaya na iVolatabu “na yalewa me dokai watina vakalevu.” (Efeso 5:33) E marau na Kalou ni doka o yalewa na itavi e lesi kina o watina.

   Nona itavi o yalewa me tokoni watina, me vukei koya me vakatulewa vinaka qai dokai koya ni ulu ni vuvale. (Vakatekivu 2:18) Na iVolatabu e vakacaucautaka na yalewa vakawati e qarava vinaka na nona itavi.—Vosa Vakaibalebale 31:10.

 Sega. Ena gauna makawa, na Kalou e vakaroti ira eso nona dauveiqaravi mera vakaluveni. (Vakatekivu 1:28; 9:1) Ia era sega ni vauci ena ivakaro qori na lotu vaKarisito nikua. O Jisu e sega ni vakaroti ira nona imuri mera vakaluveni. Ratou sega tale ga ni kaya na nona tisaipeli mera vakaluveni na veiwatini. Qori rau na vakatulewataka sara ga na veiwatini.

 E tu ena iVolatabu na ivakavuvuli ena vukei rau na veiwatini vou me marautaki nodrau vakawati. Ena yaga tale ga na ivakavuvuli vakaivolatabu ena gauna rau sotava kina na ituvaki dredre.

 Ena uqeti rau na veiwatini na ivakavuvuli vakaivolatabu me rau . . .

•   vakaraitaka na loloma dina.—1 Korinica 13:4-7; Kolosa 3:14.

•   walia na duidui e basika.—1 Korinica 10:24.

•   vakarorogo vinaka.—Jemesa 1:19.

•   veidokai.—Roma 12:10.

•   veivosoti.—1 Pita 4:8.

•   yalodina.—Marika 10:9.

•   vosovoso.—Efeso 4:2, 3.

•   cakacaka vata.—Dauvunau 4:9.

•   dina ena nodrau veiyalayalati.—Sere i Solomoni 8:7.