IVAKAMACALA NI TIKINIVOLATABU
Joni 15:13—“E Sega ni Dua na Loloma e Sivia na Loloma Qo”
“E sega ni dua na loloma e sivia na loloma qo, me dua e solia nona bula ena vukudra na nona itokani.”—Joni 15:13, iVakadewa ni Vuravura Vou.
“E sega na loloma me na uasivi cake mai na nona solia na nona bula e dua na tamata e na vukudra na wekana.”—Joni 15:13, New King James Version.
iBalebale ni Joni 15:13
O Jisu e vakavulici ira nona imuri ni bibi mera veilomani vakalevu, ra qai tu vakarau mera bolemate ena vukudra eso tale.
Qo na ka e cavuta e liu vei ratou nona yapositolo: “Qo na noqu ivakaro, mo dou veilomani me vaka ga na noqu lomani kemudou.” (Joni 15:12) Na loloma vakacava e vakaraitaka vei ratou o Jisu? Na loloma tawayalani, se loloma vosota. Ena nona cakacaka vakaitalatala e vuravura, e dau vakaliuca na veika me baleti ira nona imuri kei ira eso tale, sega ni ka me baleti koya ga. E vakabulai ira na lewenivanua mai na nodra tauvimate, qai vakavulici ira ena veika me baleta na Matanitu ni Kalou. a E cakava mada ga na cakacaka beci me rawa ni qaravi ira eso tale. (Maciu 9:35; Luke 22:27; Joni 13:3-5) Ia ena Joni 15:13, e vakaibalebaletaka tiko o Jisu na loloma e uasivi sara. Oti ga e vica na aua nona cavuta na vosa qori, e vakaraitaka na loloma uasivi ena nona yalorawarawa “me solia . . . na nona bula me kedra ivoli e le levu.” (Maciu 20:28; 22:39) E vakasakiti na sala e vakaraitaka kina nona lomani ira vakalevu eso tale.
O Jisu e lomani keda kece. Ia e lomani ira vakalevu sara na muria nona ivakavuvuli. E okati ratou nona tisaipeli me ratou nona itokani dredre ni ratou talairawarawa ena nona ivakaro, ratou qai sega ni biuti koya ni sotava na veika dredre. (Luke 22:28; Joni 15:14, 15) Qori e dua na vuna levu e solia kina na nona bula ena vukudratou.
O ira na lotu vaKarisito ena imatai ni senitiuri era muria na ivakasala i Jisu. Era bolemate tale ga ena vukudra eso tale. (1 Joni 3:16) Io, na loloma tawayalani e vakaraitaka o Jisu e kedra ivakatakilakila na lotu vaKarisito dina.—Joni 13:34, 35.
Tikina Yavolita na Joni 15:13
E volai ena Kosipeli i Joni ena wase 13 ina 17 na ka e tukuna o Jisu vei ratou nona tisaipeli ni bera nona mate, kei na iotioti ni nona masu vata kei ratou. Oti ga e vica na aua e vakamatei. Ena wase 15, o Jisu e vakatauvatani ratou na nona tisaipeli ina vaini e vua vakalevu. Ena vinakati gona me ratou duavata tiko ga kei koya me rawa ni ratou vakaraitaka ni ratou nona imuri. Sa rauta me uqeti ratou o Jisu me ratou “vua tiko ga vakalevu.” (Joni 15:1-5, 8) Dua na sala ratou cakava kina qori, ya me ratou vakuai ratou ena vukudra eso tale. E okati kina nodratou vunautaka “na itukutuku vinaka ni Matanitu ni Kalou,” me vaka ga e cakava o Jisu.—Luke 4:43; Joni 15:10, 17.
Sarava na ivakamacala lekaleka ni ivola i Joni.
a Na Matanitu ni Kalou e dua na matanitu e tiko mai lomalagi. Na Kalou e tauyavutaka nona matanitu me liutaka na vuravura qai vakayacori kina na nona inaki. (Taniela 2:44; Maciu 6:9, 10) Mo kila eso tale na ka, raica na ulutaga “Na Cava na Matanitu ni Kalou?”
Rawa ni o Wilika Tale ga
ESSENTIAL BIBLE TEACHINGS
Na Cava a Mate Kina o Jisu?
E raica vakabibi na iVolatabu na mate i Jisu. Vakacava, e tiko na inaki ni nona mate?
SAUMI NA TARO VAKAIVOLATABU
E Rawa Vakacava ni “Kedra iVoli e le Levu” na iSoro i Jisu?
E veisereki vakacava mai na ivalavala ca na ivoli?
SAUMI NA TARO VAKAIVOLATABU
E Veivakabulai Vakacava o Jisu?
Cava me vakamamasu kina ena vukuda o Jisu? E bibi ga meda vakabauti Jisu meda vakabulai kina?
VAKAMACALATAKI NA TIKINIVOLATABU
iVakamacala ni Joni 3:16—“Na Levu ni Nona Lomani Vuravura na Kalou”
E vakaraitaka vakacava na Kalou ni lomani keda vakayadudua qai vinakata meda rawata na bula?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
