“Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu. E veivakacegui na noqu ivua, e mamada tale ga na noqu icolacola.”—Maciu 11:28-30, iVakadewa ni Vuravura Vou.

 “Dou lako mai vei au, o kemudou vakayadua ga sa oca ka colata na icolacola bibi, ia ka’u na vakacegui kemudou. Vakataqara vei kemudou na noqu ivua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqu ivua, ka mamada na noqu icolacola.”—Maciu 11:28-30, New International Version.

 O Jisu e sureti ira vakayaloloma na vakarorogo mera lako vua. E vakadeitaka vei ira nira na vakabulabulataki qai vakila na vakacegu, ke ra vuli vua.

 “Ni lako mai vei au o kemuni kece oni oca, oni bikai voli ena icolacola bibi.” O Jisu e sureti ira vakayalololoma na “bikai voli ena icolacola bibi” ni lawa, kei na ivakavuvuli vakatamata mai vei ira na iliuliu ni lotu. (Maciu 23:4; Marika 7:7) Era vakila tale ga na tauvanua na nuiqawaqawa kei na oca, nira cakacaka vakaukaua me rawa nira bula kina.

 “Au na vakacegui kemuni.” E yalataka o Jisu ni na vakacegui ira na ciqoma na nona veisureti. Ena vukei ira mera kila na ka e namaka vei ira na Kalou. (Maciu 7:24, 25) Qori ena sereki ira mai na nodra bobula tu ena ivakavuvuli ni lotu lasu, kei na nodra veivakalolomataki na iliuliu ni lotu. (Joni 8:31, 32) E ka ni sasaga noda vulica qai muria na ivakavuvuli i Jisu, ia e veivakacegui.

 “Ni mai cola na noqu ivua moni vuli vei au.” Ena gauna vakaivolatabu, era dau vakayagataka na ivua na tamata cakacaka. Qori na kau e dau biu e tabadra mera colata kina e dua na ka bibi. Na vosa “ivua,” e tiko kina na vakasama ni nona vakarurugi e dua ena lewa kei na nona veidusimaki e dua tale. (Vunau ni Soro 26:13; Aisea 14:25; Jeremaia 28:4) Na matavosa “vuli vei au,” e rawa tale ga ni vakadewataki “moni mai noqu tisaipeli (gonevuli).” E uqeti ira gona na vakarorogo o Jisu mera mai nona tisaipeli nira muri koya, qai vakatotomuria nona vakaraitaki.—Joni 13:13-15; 1 Pita 2:21.

 “Oni na kunea kina na vakacegu.” E sega ni kaya tiko o Jisu me vakacegui ira mai na ituvaki dredre era sotava tiko ena gauna sara ga ya. E vakamacalataka ga vei ira nira na rawata na vakacegu, kei na inuinui. (Maciu 6:25-32; 10:29-31) O ira na ciqoma na ivakavuvuli i Jisu era nona tisaipeli tale ga, era kila ni sega ni icolacola bibi na qaravi Kalou, ia ena vakilai kina na marau dina.—1 Joni 5:3.

 “E veivakacegui na noqu ivua, e mamada tale ga na noqu icolacola.” O Jisu e yalomalumalumu qai yalomalua, e sega ni vakai ira na iliuliu ni lotu era bula ena nona gauna. (Joni 7:47-49) E sega ni bau vakasaurarataka e dua, ia e yalololoma ga qai torovi rawarawa. E sega ni namaka vakasivia na ka vei ira na nona imuri. (Maciu 7:12; Marika 6:34; Luke 9:11) E vakaraitaka tale ga vei ira na sala ena yaga kina vei ira na nona yalololoma na Kalou, ra qai vakila na vakacegu ni vinaka na nodra lewaeloma. (Maciu 5:23, 24; 6:14) O ira na vakarorogo era sega ni torovi Jisu ga ena nona itovo vinaka, era vinakata sara ga mera cola nona ivua e veivakacegui, ra qai nona tisaipeli.

 E cavuta o Jisu na vosa e volai ena Maciu 11:28-30, ni vunau tiko e Kalili ena 31 G.V. Na yapositolo ga o Maciu e volatukutukutaka na nona veisureti vakayalololoma qo o Jisu. O Maciu e dua na Jiu qai daukumuni vakacavacava tu i liu, e kila vinaka gona nodra dau vakalolomataki na tauvanua. Era vakasaurarataki mera saumi ivakacavacava ina Matanitu o Roma, ra qai dabuitaki vei ira na iliuliu ni lotu vakaJiu. Ena vakayaloqaqataki koya gona ni raica ni vakayagataka o Jisu na lewa e solia vua na Tamana o Jiova, a me sureti ira kina na yalomalumalumu, kei ira na vakalolomataki mera lako mai vua.—Maciu 11:25-27.

 E vakabibitaki ena Kosipeli i Maciu na itovo talei e vakaraitaka o Jisu, ni o koya na Mesaia yalataki, ena Tui tale ga ni Matanitu ni Kalou.—Maciu 1:20-23; Aisea 11:1-5.

 Sarava na vidio lekaleka qo ni ivakamacala ni ivola i Maciu.