E laurai ena vakadidike nira dau mamarau, bulabula, dei nodra veitokani ra qai dau vosota na dau vakavinavinaka. E kaya e dua na dauvakadidike o Robert A. Emmons, “ena sega ni tiko vei keda na itovo me vaka na vuvu, cudrucudru, kocokoco kei na veicati ke da dau vakavinavinaka.” a

 E yaga vakacava vei ira na gone nira dau vakavinavinaka? E laurai ena dua na vakadidike e caka vei ira e 700 na itabagone ena loma ni va na yabaki, ni o ira na dau vakavinavinaka era na sega ni daulawaki ena veitarogi, se vakayagataka na wainimate gaga se alakaolo, se ca nodra itovo.

•   Era sega ni dau vakavinavinaka na viavialevu. E levu na gone era namaka me caka vei ira na ka ga era vinakata. Ke va qori nomu rai, o na sega ni dau vakavinavinaka, se raica na veika vinaka era cakava vei iko eso tale e nodra iloloma vei iko.

   E levu e va tu qori nodra rai ena gauna qo. E kaya e dua na tina o Katherine, “e vakabibitaki ena vuravura qo na rai, ni dodonu me soli ga vei keda na ka eda vinakata. Era biuta mai vakalevu na tabana ni tukutuku ena mekesini, tivi kei na internet na itaba kei nai yaloyalo ni veika eda dau gadreva. Ra qai uqeti keda meda taukena na veika kece qori.”

•   Mera vakavulici na gone mera dau vakavinavinaka nira se lalai. E kaya e dua na tina o Kaye: “E rawarawa na vakavulici ira na gone. Na nodra vakavulici ena itovo vinaka nira se lalai na gone, e vaka sara ga na noda biuta na kau ena yasa ni dua na itei me vukea na kena tubu vakadodonu.”

•   Vakavulica na ka me ratou kaya. E rawa mada ga nira vakavulici na gone mera vakavinavinaka ni dua e soli iloloma vei ira se cakava vei ira e dua na ka vinaka. Nira tubu cake mera lai matua, era na vulica mera dau vakavinavinakataka na veika vinaka e caka vei ira.

   iVakavuvuli vakaivolatabu: “Me laurai na nomuni vakavinavinaka.”—Kolosa 3:15.

   “E dau ‘vakavinavinaka’ na makubui keirau tagane yabaki tolu qai dau kaya na ‘kerekere’ ni vinakata e dua na ka. E vulica qori mai vei rau nona itubutubu. E yaga vakalevu vei koya nodrau itovo vinaka kei na nodrau dau vakavinavinaka, e vulica kina me dau vakavinavinaka tale ga.”—Jeffrey.

•   Vakavulica na ka me ratou cakava. Rawa ni o vukei ratou na luvemu me ratou vola na ivola ni vakavinavinaka ni dua e soli loloma vei ratou. Ke o lesia vei ratou eso na itavi e vale, ratou na kila kina na levu ni cakacaka e dau qaravi e vale.

   iVakavuvuli vakaivolatabu: “E marau vakalevu o koya e solia na ka vakalailai o koya e taura na ka.”—Cakacaka 20:35.

   “Rau dau veivuke na luvequ itabagone, ni rau raica na ka me keitou kania, vakasaqara, qai qarava eso tale na cakacaka e vale. Ni rau cakava qori rau kila kina na levu ni itavi keirau qarava na itubutubu, rau sega kina niu dau vakawelewele.”—Beverly

•   Vakavulica me donu nodratou rai. E rawa ga nida dau vakavinavinaka keda dau yalomalumalumu, qori e vaka ga na kena tubu na kau ena qele vinaka. O ira na yalomalumalumu era kila ni na rawati ga na ka era sasagataka ena nodra veivuke eso tale, ena uqeti ira mera vakavinavinakataka na veivuke e caka vei ira.

   iVakavuvuli vakaivolatabu: “Moni yalomalumalumu ena nomuni okati ira na kena vo mera uasivi kemuni, ni oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.”—Filipai 2:3, 4.

   “Ena gauna ni vakayakavi keitou dau qitotaka na qito ni vakavinavinaka. Keitou na tukuna yadua na veika keitou vakavinavinakataka. Qori e uqeti keitou me donu neitou rai, keitou dau vakavinavinaka, keitou sega kina ni yalo ca se nanumi keitou ga.”—Tamara.

 Vakatutu: Mo ivakaraitaki. Era na dau vakavinavinaka na luvemu ke ra rogoca wasoma vei iko ni o vakavinavinakataki ira eso tale—wili kina o ira.