Eso na veiwatini e dredre mera dau veivosaki ke ra tu vata mada ga. Na cava na vuna?

•  Era dau veimaliwai ia era sega ni veivolekati—na vuna?

•  Cava o rawa ni cakava

•  Ka era kaya eso na veiwatini

•  iDusidusi me veivosakitaki

•   Oca

   “Gauna kece keirau dau veimaliwai kina ena rawa ni oca o watiqu se o au. Niu vakila na oca e dau totolo noqu cudru. E vinaka cake me keirau sara tivi.”—Anna.

•   Veivakawelei na internet

   “E rawa ni veivakawelei na sala ni veikilai ena internet, kei na ka ni veivakamarautaki e tu kina. O rawa ni vakayagataka kina e vica vata na aua, qai sega ni vosa tu vei watimu. Vaka ga drau sega ni tu vata ena dua na rumu.”—Katherine.

•   Duidui na ka drau taleitaka

   “Ni suka mai na cakacaka o watiqu e dau cakava ga na ka e taleitaka. E vinaka qori baleta ni cakacaka vakaukaua. Ia au diva me keirau vakayagataka vata na gauna qori.”—Jane.

•   Cakacaka

   “E levu era cakacaka ke ra tu mada ga e vale nira vakayagataka na iyaya vakalivaliva. Na gauna e dodonu meu vakayagataka vei watiqu au sa vakayagataka tu ena imeli se text ena ka ni cakacaka.”—Mark.

•   Vakayagataka e levu na gauna kei watimu.

   iVakavuvuli vakaivolatabu: “Vakadeitaka na veika era bibi sara.”—Filipai 1:10.

   Vakasamataka: E laurai ena ka o cakava ni o vakabibitaka nomu vakawati mai na cakacaka kei na ka o dau taleitaka? O vakayagataka ga na ivovo ni nomu gauna vei watimu?

   Vakatutu: Tuvanaka mo drau veimaliwai vakalevu. Me kua ni dua na ka me vakasosani kemudrau ena gauna drau veimaliwai kina.

   “Au taleitaka ni tuvanaka o watiqu me keirau cakava vata e dua na ka. Au vakila kina niu mareqeti, au vakadeitaka kina ni via solia nona gauna vei au. Au sa qai lomani koya ga kina vakalevu.”—Anna.

•   Me kua ni vakawelei iko na iyaya vakalivaliva.

   iVakavuvuli vakaivolatabu: “E vagauna na ka kece ga.”—Dauvunau 3:1.

   Vakasamataka: Ni o veimaliwai kei watimu e dau vakavica na levu ni gauna o vakalaiva kina me vakawelei iko nomu iyaya vakalivaliva?

   Vakatutu: Tovolea me dua mada ga na gauna drau kana vata kina e veisiga, biuta nomu talevoni ina dua tale na rumu. Qori e gauna vinaka mo drau veivosakitaka na ka drau sotava ena siga ya.

•   Ke rawa drau cakava vata eso na itavi.

   iVakavuvuli vakaivolatabu: “E vinaka na le rua mai na le dua ni vinaka na isau ni nodrau cakacaka vakaukaua.”—Dauvunau 4:9.

   Vakasamataka: E vakacava na levu ni gauna drau dui cakava kina eso na itavi, me vaka na volivoli?

   Vakatutu: Drau qarava vata eso na itavi ke itavi lalai mada ga.

   “E gauna vinaka mo drau veimaliwai ni drau voli kakana, sava iyaya ni kana, lobi isulu, teitei, se koti co.”—Nina.

•    Kua ni namaka vakasivia na ka

   iVakavuvuli vakaivolatabu: “Me kilai nomuni yalorawarawa.”—Filipai 4:5.

   Vakasamataka: Rawa vakacava mo kua ni namaka vakasivia na ka vei watimu?

   Vakatutu: Drau veivosaki wasoma mo drau kila kina na ka drau dui vinakata. Mo drau duavata ena sala mo drau vakayagataka kina nomudrau gauna.

   “E bulabula vinaka o watiqu, ia au tautauvimate. Levu na gauna au kaya vua me lai vakaukauayago, ia au na tiko ga e vale me yacova ni lesu mai niu vinakata meu vakacegu. Keirau taleitaka qori ni rawa kina me keirau marautaka na ka keirau dui cakava.”—Daniela.

 Drau saga mo drau dui sauma na taro qo. Oti drau qai veivosakitaka vakaveiwatini na nomudrau isaunitaro.

•    O nanuma ni sa levu na gauna drau vakayagataka vata vakaveiwatini ena gauna qo?

•   Cava o rawa ni vakavinavinakataka vei watimu ena nona saga mo drau veimaliwai vakalevu?

•   Cava o vinakata me vakavinakataka o watimu?

•   E vakacava na levu ni gauna e vakawelei iko kina na iyaya vakalivaliva o sega ni rogoca kina nona vosa tiko vei iko o watimu?

•   Rawa vakacava mo kua ni namaka vakasivia na ka vei watimu?

•   Cava o rawa ni cakava ena macawa qo mo veimaliwai vakalevu kina kei watimu qai kua ni vakalaiva e dua na ka me vakasosani kemudrau?