Ena tiko na gauna ena vakacudrui luvemu eso na ka e sega ni cakava rawa. O na vukei koya vakacava?

•  Ka mo kila

•  Ka o rawa ni cakava

 Eda dau cala kece. E kaya na iVolatabu nida “dau tarabe kece,” wili tale ga kina o ira na gone. (Jemesa 3:2) Ia e yaga na veika dredre era sotava, ni na vukei ira mera kua ni soro koso. Era sega ni sucu kaya mai na itovo qori, ia e rawa nira bucina. E kaya e dua na tina o Laura: “Keirau raica vakaveiwatini e vinaka mera vulica na gone na sala mera walia kina nodra malumalumu mai na nodra vakalecalecava tu. Ena vukei ira tale ga mera vosota ke sega ni yaco na ka era namaka.”

 Levu na gone era sega ni vosota rawa. Eso na gone era sega ni vulica e dua na ka, nira veitovaki na itubutubu. Kena ivakaraitaki, ke sega ni vinaka nona maka o gone, se veiba kei na dua nona itokani, eso na itubutubu ena totolo ga nodra beitaki qasenivuli kei ira na itokani.

 Ia era na vuli qai vakadodonutaki vakacava na gone ke ra dau veitovaki na itubutubu?

•   Vakavulici koya ni tiko na itinitini ni ka e cakava.

   E kaya na iVolatabu: “Na ka kece e kaburaka e dua ena tamusuka tale ga.”—Kalatia 6:7.

   Na ka e caka e tiko na kena itinitini. Kena ivakaraitaki, na ka e vakacacani ena saumi me rawa ni vakavinakataki. E tiko tale ga na revurevu ni ka ca e caka. E dodonu mera kila na gone ni tiko na ka e vakavuna kei na kena revurevu, e bale tale ga vei ira na ka e yaco. Kua gona ni beitaki ira eso tale se soli ulubale ena vuku i luvemu. Laiva mera vakila tale ga na ca ni ka era cakava me vakatau tiko ena nodra yabaki ni bula. Me matata tiko vua na ka ca e caka kei na kena itinitini.

•   Vakaraitaka vua na kena iwali.

   Vakavuvuli vakaivolatabu: “De bale vakavitu na yalododonu ena duri tale, ia o ira na tamata ca era na tarabe ena ka ca.”—Vosa Vakaibalebale 24:16.

   Dau mosimosi ke sega ni rawa vinaka noda sasaga, ia e sega ni bibi qori. Vukei luvemu me walia nona malumalumu me rawa ni kila na ka me cakava ke cala tale ena dua na gauna, me kua ga ni cala nona rai ena ka e yaco. Kena ivakaraitaki, ke sega ni rawata nona veitarogi, vukei koya me vuli lesoni vakalevu. (Vosa Vakaibalebale 20:4) Ke veiba kei na dua nona itokani, vukei koya me dauveivosoti ke sega mada ga ni cala.—Roma 12:18; 2 Timoci 2:24.

•   Vukei koya me kua ni namaka vakasivia na ka.

   Vakavuvuli vakaivolatabu: “Au tukuna kina vei kemuni me kua ni dua e sivia na ka e nanuma me baleti koya.”—Roma 12:3.

   Ena sega ni veivuke ke o kaya vua ni “vinaka duadua ga” o koya. O ira mada ga na gone vuku e rawa ni lutu nodra maka ni veitarogi, se ra na sega ni qaqa tu ga na gone dauqito. Ia o ira na gone era sega ni namaka vakasivia na ka, e rawa nira vosota na ituvaki dredre era sotava.

   E kaya na iVolatabu na leqa eda sotava e rawa ni vakaukauataki keda, vukei keda tale ga meda vosota. (Jemesa 1:2-4) E vakavu rarawa dina na veika dredre kei na ka ca eda sotava, ia e rawa ni o vukei luvemu me donu tiko ga nona rai.

   Ena vinakati na gauna kei na sasaga mera vakavulici na gone mera kua ni soro. Ena yaga tale ga qori nira sa itabagone. E kaya na ivola Letting Go With Love and Confidence: “O ira na itabagone era kila na ka mera cakava ni basika na leqa, era sega ni dau cakava e dua na ka rerevaki se ka vakalialia. Era na kila vinaka na ka mera cakava ni yaco na ituvaki tawanamaki.” Nodra valuta na ituvaki dredre, ena yaga tale ga nira sa uabula.

 Vakatutu: Mo ivakaraitaki vei luvemu. Na sala o walia kina na leqa ena gauna qo, ena vukei koya tale ga ni basika na ituvaki dredre