O bau vakadinadinataka ni levu na lotu era saga ga mera rawa ilavo mai na nodra vukei ira vakayalo na lewenivanua? Era tabaka e levu na itukutuku ni veivoli ra qai volivolitaki. E levu na ilavo era saumi kina nodra iliuliu ni lotu, ra vutuniyau tale ga. Qo eso na kena ivakaraitaki:

•   E dua na bisovi ni Katolika e vakayagataka tiko me sivia e 13 na yabaki na ilavo ni lotu me jajitaka kina vaka150 na waqavuka (private jet), e sauma tale ga vaka200 me vodo ena motoka saulevu na limousine. E vakayagataka e sivia e va na milioni na dola me vakavinakataka na vale e tiko kina e taukena na lotu.

•   E dua tale ga na italatala e Aferika e dau tuvanaka na lotu ra qai tiko kina e dua na iwiliwili levu. E levu na ka e volitaki tu ena nona valenilotu me vaka na waiwai e veivakabulai, tawelu kei na siqeleti. Levu vei ira nona lewenilotu era dravudravua, ia e vutuniyau o koya.

•   Sa cicivaki tu vakabisinisi e rua na ulunivanua e Jaina e nodra na lotu Buda. Dua tale ga na valenilotu kilai levu na Shaolin Temple e okati ena levu na ka ni bisinisi, e kilai levu tale ga na kena iliuliu.

•   Levu na bisinisi e Merika era saumi ira eso tale mera vakavulica na ka ni lotu se dusimaki ira vakayalo nodra tamata cakacaka.

 Cava nomu rai nira vakaitavi tiko na lotu ena ka ni bisinisi? O bau vakasamataka tu na rai ni Kalou vei ira era saga mera rawa tubu ena veika vakalotu?

 E sega ni vakadonuya qori na Kalou. E kaya na iVolatabu ni sega ni taleitaka na Kalou nodra kaya na bete nira matataki koya, ia na gauna vata qori era kaya mera “saumi kina.” (Maika 3:11) E cata na ivakarau ni nodra caka bisinisi kocokoco, era vukica kina na vanua ni sokalou me nodra “qara na daubutako.”—Jeremaia 7:11.

 E va tale ga qori nona rai o Jisu vei ira era vakayagataka na lotu mera rawa ilavo kina. Ena nona gauna, era rawatubu na iliuliu ni lotu mai vei ira na dauveivoli kocokoco nira vakadonuya mera volivolitaki ena loma ni valenisoro e Jerusalemi. Era lawakitaki ira na lewenivanua era gole mera lai sokalou. E doudou o Jisu ni cemuri ira na dauveivoli veivakaisini qori mai na valenisoro, e kaya: “Ni kua ni cakava tiko na vale i Tamaqu me vale ni veivoli!”—Joni 2:14-16.

 E vakaraitaka tale ga o Jisu ena cakacaka vakaitalatala na ivakarau ni nona rai na Kalou. (Joni 8:28, 29) Ni vakavulici ira na tamata ena veika me baleta na Kalou, e sega ni tukuna mera saumi koya vakailavo. E sega ni kaya tale ga mera saumi koya ena cakamana e cakava, me vaka nona vakani ira na lewe levu, vakabula na tauvimate kei na nona vakaturi ira na mate. E sega ni vakayagataka o Jisu nona cakacaka vakaitalatala me vutuniyau kina, e sega mada ga na nona vale.—Luke 9:58.

 E kaya o Jisu vei ira nona imuri mera kua ni vaqara ilavo ena nodra cakacaka vakalotu. E kaya: “E soli wale vei kemudou, dou solia wale tale ga.” (Maciu 10:8) Era vakatokai mera lotu vaKarisito na imuri taumada i Jisu nira muria nona ivakaro. Qo eso na kena ivakaraitaki:

•   E dau tomani Jisu ena cakacaka vakaitalatala na yapositolo o Pita. A soli lavo vua e dua na tagane na yacana o Saimoni ni vinakata me veiliutaki. Sega tale ni lomalomarua o Pita ni vakasega vua qai vakadodonutaki koya. E kaya: “Mo drau rusa vata mada ga kei na nomu siliva, ni o nanuma ni o rawa ni volia na isolisoli wale ni Kalou ena ilavo.”—Cakacaka 8:18-20.

•   E kilai na yapositolo o Paula ni daukaulotu. Dina ni veiqaravi me vica vata na yabaki ena levu na ivavakoso vaKarisito, ia e sega ni vinakata me rawa ilavo ena itavi e qarava. O Paula kei ira nona itokani lotu vaKarisito era sega ni “volitaka na vosa ni Kalou me vakataki ira e levu.” (2 Korinica 2:17) Ia e vola: “Keitou cakacaka ena bogi kei na siga, me kua kina ni keitou vakacolata e dua vei kemuni ena levu na ka vakailavo, ni keitou vunautaka vei kemuni na itukutuku vinaka ni Kalou.”—1 Cesalonaika 2:9.

 Dina nira vinakata na lotu vaKarisito taumada eso na ilavo ena cakacaka vakavunau, kei na cakacaka ni veivuke raraba. Ia era sega ni vinakata mera saumi ena nodra vukei ira eso tale mera kila na Kalou. Ena vakatau ga vei ira na tamata na ka era via solia qai yavutaki ena ivakavuvuli qo:

•   2 Korinica 8:12: “E ciqomi vakalevu ga na ka e soli ena yalo e vinakata. E namaki vua e dua me solia ga na ka e tu vua, e sega ni namaki me solia na ka e sega vua.”

   Kena ibalebale: E sega ni bibi na levu ni ka e solia e dua, e bibi ga na inaki e solia kina.

•   2 Korinica 9:7: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e soli ka ena marau.”

   Kena ibalebale: Na Kalou e sega ni vakasaurarataka e dua me soli ka. E taleitaki ira ga era soli ka mai vu ni lomadra.

 E vakamatatataka na iVolatabu ni Kalou e sega ni vakadonuya na lotu, se na ivakarau ni sokalou kece. (Maciu 7:21-23) E vakasakiti e dua na parofisai ni iVolatabu ni vakatauvatana na soqosoqo lotu lasu kece ina dua na saqamua, ni tokoni ira tiko na matanitu me rawaka kina vakailavo, kei na nodra lawakitaki e levu na tamata. (Vakatakila 17:1-3; 18:3) E parofisaitaka tale ga ni Kalou ena vakarau vakataulewataki lotu lasu.—Vakatakila 17:15-17; 18:7.

 Ena gauna qo na Kalou e cata na ka e cakava tiko o lotu lasu, oya na nona lawakitaki na tamata, se nona vakavuna mera yawaka na Kalou. (Maciu 24:11, 12) E uqeti ira ga na yalomalumalumu mera sokaloutaki koya ena sala e vakadonuya mera dro tani tale ga mai vei lotu lasu.—2 Korinica 6:16, 17.