Cava e Kaya na iVolatabu ena Leqa ni Kakana Nikua?

SARAVA/ROGOCA

“Me kua ni vakilai tale na leqa ni kakana.” Qori na ka era tukuna na iliuliu e veiyasa i vuravura me rawa ni wali na leqa e tarai keda tiko na kawatamata, a ya na leqa ni kakana. Vakacava ena rawa ni yaco e dua na gauna sa na sega na walokai? Cava e kaya na iVolatabu?

Parofisaitaka na iVolatabu na leqa ni kakana ena gauna qo

E parofisaitaka na iVolatabu ni na vakilai na leqa ni kakana ena gauna qo, e vakatokai na “iotioti ni veisiga.” (2 Timoci 3:1) Na Kalou e sega ni vakavuna na leqa ni kakana, ia e kaya meda namaka ni na yaco qori. (Jemesa 1:13) Dikeva mada e rua na parofisai vakaivolatabu qo.

“Ena vakilai na leqa ni kakana . . . ena levu na vanua.” (Maciu 24:7) E parofisaitaka na iVolatabu ni na vakilai na leqa ni kakana ena levu na vanua. Era kaya na kenadau era dikeva na sala e vakau qai veisoliyaki na kakana: “Sa qai torosobu ga na leqa ni kakana e vuravura, e sega tale ga ni veirauti na kakana bulabula.” b E vica vata na drau na milioni e veiyasa i vuravura e sega na kedra qai ka ni rarawa ni levu era mate kina.

“Au raica sara e dua na ose loa, o koya e vodo tiko kina e taura tu e ligana e dua na ivakarau.” (Vakatakila 6:5) Na dauvodo ose vakaivakatakarakara qori e vakatayaloyalotaka na dausiga ena iotioti ni veisiga. c Na ivakarau e taura tu e ligana, e dusia ni na vakarautaki kina na kakana lailai me rauti keda kece. Ni vodo tiko, e rogoca e dua na domo e kaya ni na saulevu na kakana qai vakarota meda kua ni vakasabusabutaka. (Vakatakila 6:6) Qori e dusia sara ga na leqa ni kakana e yaco tu e vuravura nikua, qai vica vata na bilioni era sega ni rawa ni volia na kakana bulabula.

Sala ena oti kina na leqa ni kakana

Era kaya na kenadau ni levu na kakana e tu e vuravura qai rawa nida kana kece kina. Na cava ga e lailai tiko kina na kakana? Na cava e kaya na iVolatabu ni na cakava na Dauveibuli o Jiova d ena ituvaki qori?

Leqa: E sega ni tarova rawa na matanitu na dravudravua, kei na veika tawadodonu e vakavuna mera walokai kina e levu.

Kena iWali: Ena sosomitaka na matanitu vakatamata e dua na matanitu vinaka, ya na Matanitu ni Kalou. (Taniela 2:44; Maciu 6:10) Nikua, e levu na dravudravua era saga mera volia na kedra, ia ena sega ni yaco qori ni veiliutaki na Matanitu ni Kalou. E kaya na iVolatabu me baleti Jisu Karisito na Tui ni Matanitu ni Kalou: “Ni na vakabula o koya na dravudravua e tagi ni kere veivuke, o koya tale ga na vakaloloma kei koya e sega ni vukei . . . Ena levu na covuata e vuravura, ena vuabale ena dela ni veiulunivanua.”—Same 72:12, 16.

Leqa: Na ivalu e vakavuna na vakacaca kei na leqa vakailavo, e lai tarova se vakaleqa na veisoliyaki ni kakana.

Kena iWali: “Ena mai vakaotia [o Jiova] na ivalu e vuravura taucoko. E musuka o koya na dakaititi qai vorolaka na moto, e vakama na qiqinivalu ena bukawaqa.” (Same 46:9) Na Kalou ena vakarusa na iyaragi ni ivalu kei ira na vakavuna na ivalu. Ena sega ni vakilai tale na leqa ni kakana. E yalataka na iVolatabu: “Era na buroro na yalododonu.”—Same 72:7.

Leqa: Na veisau ni draki kei na leqa tubukoso e vakacacana na iteitei, era mate tale ga na manumanu.

Kena iWali: Na Kalou ena lewa na igu kaukaua ni vuravura sa na rawa ni tei kina na kakana bulabula. E kaya na iVolatabu: “E vakaruruya [o Jiova] na cagi kaukaua, e maravu na biau ni wasawasa . . . E vukica na vanua dravuisiga me tobu ni kuta, kei na qele mamaca me waivure. E vakavuna o koya mera tiko e kea na walokai . . . Era kakaburaki ena veiwere qai tea na loganivaini e vuataka na vuata vinaka.”—Same 107:29, 35-37.

Leqa: O ira na tamata kocokoco kei ira na daulawaki era vakarautaka na kakana sega ni bulabula, ra qai tarova na kau ni kakana vei ira era gadreva.

iWali: Na Matanitu ni Kalou ena vakarusai ira na daulawaki kei ira na daucaka ca. (Same 37:10, 11; Aisea 61:8) E tukuni ena iVolatabu ni Kalou o Jiova “e vakadeitaka na lewadodonu vei ira na dabuitaki, e solia na madrai vei ira na walokai.”—Same 146:7.

Leqa: E veiyabaki e rauta ni dua na ikatolu ni kakana e veiyasa i vuravura e vakasabusabutaki.

Kena iWali: Ni veiliutaki na Matanitu ni Kalou ena wasei vakatautauvata na kakana. Ni se bula e vuravura o Jisu, e raica me kua ni vakasabusabutaki na kakana. Kena ivakaraitaki, e vakani ira vakacakamana e sivia ni le 5,000. Oti e vakaroti ratou nona tisaipeli: “Dou kumuna mai na tikitikina sa vo me kua ni maumau.”—Joni 6:5-13.

Ena vakarau vakaotia na Matanitu ni Kalou na vu ni leqa ni kakana, eda na qai marautaka yani na levu ni kakana qai bulabula. (Aisea 25:6) Mo kila eso tale na sala ena cakava kina qori na Matanitu ni Kalou, raica na ulutaga “Gauna Cava ena Veiliutaki Kina e Vuravura na Matanitu ni Kalou?”

a Na ituvatuva ni 2030 Agenda for Sustainable Development, era duavata kina na matanitu kece era lewena na Matabose kei Vuravura ena 2015.

b Na ripote e vakarautaka na Food and Agriculture Organization of the United Nations, na International Fund for Agricultural Development, na United Nations Children Fund, na United Nations World Food Programme, kei na World Health Organization.

c Mo kila eso tale na ka me baleti ratou na va na dauvodo ose e cavuti ena Vakatakila, raica na ulutaga “O Ratou na va na Dauvodo Ose”

d O Jiova na yaca ni Kalou. (Same 83:18) Raica na ulutaga “O Cei o Jiova?”