YADRA TIKO!

Lotu kei na iValu e Ukraine—Cava e Kaya na iVolatabu?

SARAVA/ROGOCA

Dikeva mada na ka era cakava tiko na iliuliu ni lotu kilai levu ena ivalu e Ukraine:

“E sega vakadua ni vakacala o Patriarch Kirill na iliuliu ni lotu Orthodox e Rusia, na ka e cakava tiko na matanitu o Rusia vei Ukraine. . . . E vakatetea tiko na itukutuku lasu me baleti Ukraine. E cakava qori me rawa ni valuti Ukraine o Putin.”—EUobserver, 7 ni Maji, 2022.
“E tokona o Patriarch Kirill nona valuti Ukraine o Rusia. E kaya ni na tarova na valavala ca na veivaluvaluti qo.”—AP News, 8 ni Maji, 2022.
“Ena siga Moniti e masulaki ira na lewenivanua e Ukaraine o Metropolitan Epiphanius I na iliuliu ni lotu Orthodox e Kyiv mai Ukraine, ‘nira valuti ira na mataivalu e Rusia’ . . . [E] kaya tale ga ni sega ni okati me valavala ca nodra vakamatei na sotia ni Rusia.”—Jerusalem Post, 16 ni Maji, 2022.
“Keimami na [isoqosoqo ni veimatalotu na Ukrainian Council of Churches and Religious Organizations (UCCRO)], keimami tokoni ira na mataivalu e Ukraine kei ira na veitokoni kina. Keimami masulaki ira tale ga mera qaqa ena vuku i Ukraine.”—UCCRO, a 24 ni Feperueri, 2022.

Cava o nanuma? E dodonu vei ira na veimatalotu era kaya nira imuri i Jisu Karisito mera uqeti ira na lewenilotu mera veivaluvaluti? Cava e kaya na iVolatabu?

Na ivolatukutuku ni lotu ena ivalu

E laurai ena ivolatukutuku ni kawatamata ni o lotu e tokona, vakadonuya qai uqeta na ivalu. E kaya ni cakava qori me rawati kina na sautu. Ia vicasagavulu na yabaki nodra vakavotuya tiko mai na iVakadinadina i Jiova na nona veivakaisini o lotu. Dikeva mada e vica na kena vakaraitaki e tabaki ena nodra ivola vakaivolatabu.

E volai ena ulutaga vakavalagi “The Crusades—A ‘Tragic Illusion’” ni vakavuna na Roman Catholic na veivakamatematei. E kaya ni cakava qori ena yaca ni Kalou kei Karisito.
E vakamacalataki ena ulutaga vakavalagi “The Catholic Church in Africa” ni sega ni tarova rawa o lotu na veivaluvaluti vakayavusa, wili kina na labakawa.
E vakamacalataki ena ulutaga “Me Beitaki o Lotu?,” na ulutaga vakavalagi “Religion’s Role in Man’s Wars,” kei na “Religion Takes Sides” na ka e cakava tiko na lotu Katolika, lotu Orthodox, kei na Protestant mera tokona kina e levu na ivalu.

E dodonu me tokona na ivalu e dua na lotu vaKarisito?

Ka e vakavulica o Jisu: “Mo lomana na kainomu me vaka nomu lomani iko.” (Maciu 22:39) “Lomani ira tiko ga na kemudou meca.”—Maciu 5:44-47.

Vakasamataka: Ke dua na lotu e kaya ni muria na ivakaro i Jisu me baleta na veilomani, vakacava e dodonu me uqeti ira na lewenilotu mera veivakamatei ena ivalu? Mo kila na kena isau wilika na ulutaga vakavalagi “True Christians and War,” kei na “E Rawa Beka Nida Lomani Ira na Keda Meca?”

Ka e vakavulica o Jisu: “E sega ni vakavuravura na noqu Matanitu. Ke vakavuravura na noqu Matanitu, era na vala na noqu tamata meu kua ni soli yani.” (Joni 18:36) “Nira na mate ena iseleiwau o ira era vakayagataka na iseleiwau.”—Maciu 26:47-52.

Vakasamataka: Ke ra sega ni vakatarai na lotu vaKarisito mera vala mera taqomaki Jisu, vakacava e rawa nira vala se vakayagataka na iyaragi mera vakamatei ira kina eso tale? Mo kila na sala era muria kina na lotu vaKarisito taumada na ivakaraitaki kei na ivakavuvuli i Jisu, wilika na ulutaga vakavalagi “Erau Salavata Beka na iValu na iVakavuvuli vaKarisito?”

Cava ena yacovi ira na lotu era uqeta na ivalu?

E kaya na iVolatabu ni Kalou e sega ni vakadonui ira na veimatalotu era kaya nira imuri i Jisu, ra qai sega ni muria tiko na ka e vakavulica.—Maciu 7:21-23; Taito 1:16.

E vakamacalataki ena ivola na Vakatakila, ni Kalou e beitaki ira na veimatalotu era vakavuna nodra mate “o ira kece era vakamatei e vuravura.” (Vakatakila 18:21, 24) Mo kila na vuna wilika na ulutaga, “O Cei o Papiloni na Ka Levu?”
E kaya o Jisu ni o ira kece na veimatalotu e sega ni vakadonuya na Kalou era na vakarusai ena vuku ni veika ca era cakava, me vaka ga na kau ca e “lauta laivi qai kolotaki ina bukawaqa.” (Maciu 7:15-20) Mo kila na sala ena yaco kina qori wilika na ulutaga, “Sa Voleka na iTinitini ni Lotu Lasu!”

Era Duatani na iVakadinadina i Jiova

O ira na iVakadinadina i Jiova e Rusia, Ukraine kei na veiyasa i vuravura era muria na ivakaro i Jisu mera tawaveitovaki qai sega ni vakaitavi ena ivalu. Qori na vuna era sega ni vakaitavi se tokona kina na veivaluvaluti qo kei na so tale. Eso vei ira era tusaqati nira saga mera muria na nodra vakabauta e yavutaki vakaivolatabu. (Joni 15:19, 20; 2 Timoci 3:12) Kena ivakaraitaki, na matanitu o Rusia e biuti ira e valeniveivesu na iVakadinadina i Jiova, qai vakalolomataki ira eso tale. Era vesuka tale ga na nodra vanua ni sokalou. Mo kila eso tale na ka, rai ena www.jw-russia.org.

Sarava na vidio e va na miniti na kena balavu, Era Dei tu ga Nira Vakacacani, mo raica na sala era tusaqati kina na iVakadinadina i Jiova e Rusia ena vuku ni nodra vakabauta.
Era dau kilai na iVakadinadina i Jiova nira tawaveitovaki. Sarava na vidio vakavalagi Firm Under Opposition, mo kila na sala era tawaveitovaki kina dina ga nira tusaqati vakalevu vei ira na Nazi e Jamani, kei na matanitu makawa na Soviet Union.

Yalovinaka rai ena neimami website mo kila na veika keimami vakabauta, okati kina na yalayala ena iVolatabu ni na oti na ivalu ena gauna se bera mai. (Aisea 2:4; Jeremaia 29:11) Veitaratara mai mo kila eso tale na ka.

Na photo credits imawi ena imatau: Tabaka o Sefa Karacan/Anadolu Agency/Getty Images; Maxym Marusenko/NurPhoto via Getty Images

a E okati ena isoqosoqo na UCCRO se Ukrainian Council of Churches and Religious Organizations, e 15 na matalotu me vaka na lotu Orthodox, Greek se Roman Catholic, lotu Tawase, lotu vakaJiu kei na Musulomani.