E vica wale sara era vakaraitaka tiko na itovo vinaka. O ira na tauvimate dau cudrucudru era dau kailavaki ira na vuniwai. Eso era sega ni dokai ira na cakacaka e valenikana ra qai vosataki ira. Eso na pasidia ni waqavuka era cakava na itovo kaukaua vei ira na veiqaravi kina. O ira na gone ca e koronivuli era veivakalialiai, veivakarerei qai veivala vei ira na qasenivuli. Eso na daunipolitiki era cakava na itovo lolovira, ia eso tale vei ira qori e vakavu leqa tale vei ira na itovo vinaka era vakaraitaka.

 E idusidusi nuitaki duadua na iVolatabu ena sala me vakaraitaki kina na itovo vinaka. E vakamacalataka tale ga na vuna sa sega ni vinaka kina na nodra itovo e levu.

 E vakadinadinataki e veiyasa i vuravura na kena sa qai seavu tiko ga na itovo e vinaka, e kilikili, kei na veidokai.

•    Era vakatarogi na lewenivanua e Merika ra qai kaya ni torosobu sara ga na itovo ni tamata ni vakatauvatani ena 22 na yabaki sa oti.

•    Ena dua tale na vakadidike e caka ena 28 na vanua era vakatarogi kina e sivia ni le 32,000, e 65 na pasede vei ira qori era kaya ni ca duadua na itovo ni tamata ena gauna qo.

 Sa parofisaitaka tu na iVolatabu na itovo eda sa raica tiko ena gauna qo.

•    “Ni na duatani sara na iotioti ni veisiga, ena vakilai kina e levu na ka dredre. Nira na dau lomani ira ga na tamata, era na dau tukutukuni ira, era na qaciqacia, era na dau veibeci, era na talaidredre vei ira nodra itubutubu, era na sega ni dau vakavinavinaka, . . . era na sega ni lewa vinaka na yalodra, [qai] voravora.”​—2 Timoci 3:​1-3, Vakadewa ni Vuravura Vou.

 Mo kila eso tale na ka me baleta na kena sa vakayacori tiko na parofisai qo, wilika na ulutaga “Vakacava sa Parofisaitaki tu na Nodra iTovo e Levu Nikua?”

 Sa qai seavu tiko ga na itovo vinaka ni tamata e veiyasa i vuravura. Ia e vica vata na milioni era raica ni iVolatabu duadua ga e idusidusi vinaka me baleta na itovo vinaka. Na kena ivakasala e “nuitaki tu ga, ena gauna qo qai tawamudu.” (Same 111:8) Dikeva mada eso na kena ivakaraitaki:

•    Ka e kaya na iVolatabu: “Na ka kece dou vinakata mera cakava vei kemudou na tamata, dou cakava tale ga vei ira.”​—Maciu 7:12.

   Kena ibalebale: Me vaka noda vinakata mera caka vinaka ra qai dokai keda eso tale, e dodonu tale ga meda cakava qori vei ira.

•    Ka e kaya na iVolatabu: “Ni oni sa biuta tani na veidabui, ni tukuna ga na ka dina vua na kainona.”​—Efeso 4:25.

   Kena ibalebale: Meda dau dina ena ka kece eda tukuna qai cakava.

 Mo kila eso tale na ka me baleta na ulutaga qo, yalovinaka wilika:

•    Na Vale ni Vakatawa e kena ulutaga, “E Donu se Cala? E Tiko na iNuinui Nuitaki.”

•    Na ulutaga “E Vukei Keda Vakacava na iVolatabu Meda Yalorawarawa?.”