Ena ika24 ni Me 2022, e yaco e dua na ituvaki vakaloloma ena tauni lailai o Uvalde e Texas, mai Merika. E kaya na niusiveva na New York Times, “e vanavana e dua ena loma ni koronivuli na Robb Elementary School . . . ra qai mate kina e le 19 na gonevuli kei na rua na qasenivuli”

 Ka ni rarawa ni dau yaco wasoma na ka vakadomobula va qori. E volai ena niusipepa na USA Today, “ena yabaki sa oti e rauta ni 249 na veivanavanai e caka e koronivuli. Qori e sivia na iwiliwili me tekivu mai na 1970.”

 Cava e yaco kina na veika vakaloloma qori? Eda na vosota vakacava na veika ca e yaco tiko? Vakacava ena rawa ni oti na itovo kaukaua? E tu ena iVolatabu na isaunitaro qori.

•    E kaya na iVolatabu nida bula tu qo ena “iotioti ni veisiga.” E levu ena “yali vei ira na veilomani vakaveiwekani . . . era na voravora” tale ga. Kena ibalebale, era na cakava na ka mera nanumi ira ga kina, qai kaukaua na nodra itovo. O ira va qori ena “qai torosobu ga” na nodra ivakarau. (2 Timoci 3:1-5, 13) Mo kila e levu tale na ka, wilika na ulutaga “Vakacava sa Tukuna Rawa tu na iVolatabu Nodra iVakarau ni Bula na Tamata ena Gauna Qo?”

 Levu era vaqaqa, ‘Cava e sega ni tarova kina na Kalou na veivanavanai e koronivuli?’ Mo raica na kena isau ena iVolatabu, wilika na ulutaga “Era Sotava na Tamata Vinaka na Veika Ca—Na Vuna?”

•    ‘Na ka kece e volai e liu e volai meda vakavulici kina, me rawa nida . . . vakacegui mai na veika e volai ena iVolatabu.’—Roma 15:4.

 Ena rawa ni vukei keda na ivakavuvuli vakaivolatabu meda vosota na itovo voravora ena vuravura qo. Mo kila eso tale na ka raica na Yadra! ena ulutaga, “Ena Rawa ni Oti Vakadua na iTovo Kaukaua?”

 Wilika na ulutaga vakavalagi “Disturbing News Reports and Your Children,” e tiko kina na vakatutu era rawa ni vukei luvedra kina na itubutubu mera kila na ka mera cakava nira raica se rogoca e dua na nius vakadomobula.

•    “Ena vakabulai ira mai na veivakasaurarataki kei na ivalavala kaukaua.”—Same 72:14.

•    “Era na tukitukia na nodra iseleiwau me batinisiviyara kei na nodra moto me isele ni sasamaki. Ena sega ni lave iseleiwau e dua na matanitu ina dua tale na matanitu. Era na sega ni vulica tale na ivalu.”—Maika 4:3.

 Na Kalou ena cakava na ka eda sega ni cakava rawa na tamata. Ena vakarusa vakadua na nona Matanitu vakalomalagi na iyaragi, ena vakaotia tale ga na itovo kaukaua kece. Mo kila na ka ena cakava na Matanitu ni Kalou, wilika na ulutaga “Ena Qai ‘Vakilai na Sautu’ ena Matanitu ni Kalou.”