HÅKAN DAVIDSSON | ITALANOA NI NONA BULA
Tokona na Vakatetei ni ka Dina Vakaivolatabu
Au a sucu qai tubu cake mai Suwiteni. Niu se itabagone, au muria na nodra rai e levu era sega ni vakabauta ni bula na Kalou. Au sega gona ni taleitaka meu vulica na iVolatabu ena gauna ratou vuli tiko kina kei ira na iVakadinadina i Jiova o ratou na noqu vuvale.
Ia na levu ni nona sureti au o tamaqu, au mani nanuma meu tomani ratou ena vulivolatabu. Au qoroya na kena vakamatatataki na veika vakasaenisi ena iVolatabu. Ni toso na gauna, au vakadeitaka ni iVolatabu e vosa ni Kalou, donu tale ga na ka era vakavulica na iVakadinadina i Jiova, ra qai bulataka sara ga. Keirau a papitaiso kei tamaqu ena 1970, rau qai papitaiso ni oti e vica na yabaki o tinaqu kei ganequ.
Levu vei ira na noqu icaba era taleitaka vakalevu na marau. Ia meu tukuna na ka dina niu se yabaki 17, au dau taleitaka sara ga na varau ni bula ya. E laurai sara ga vei rau na veiwatini rau vakavulici au ena iVolatabu na marau dina, qori e uqeti au meu muria nodrau ivakaraitaki. Na gauna au yabaki 21 kina au sauva sara na isausau qori.
Au papitaiso vata ga kei noqu Ta (ena yasaqu imawi)
Au vakadinadinataka na marau dina e kauta mai na veiqaravi vakapainia, au veivutunitaka niu a sega ni tekivuna mai na gauna au se tabagone kina. Au dau taleitaka vakalevu na vunau ena ikelekele ni waqa e Göteborg, niu rawa kina ni wasea na ka dina vei ira na tamata era gole mai na veivanua mera cakacaka ena waqa ni kako.
Sa sivi qo e 50 na yabaki na noqu marautaka tiko na noqu vakaitavi ena kena vunautaki na tukutuku vinaka vei ira na tamata era dui vosavosa. Meu talanoataka mada se a tekivu vakacava qori.
Na Porokaramu na MEPS
Au dau cakacaka vagauna ena kabani ni tabaivola me tokona noqu cakacaka vakapainia. Ena gauna qori sa veisau tiko na ivakarau ni tabaivola. Ya na kena vakayagataki e dua na mataqali itaba me caka kina na tabaivola, sa sega ni vakayagataki vakalevu na peleti kaukamea ni matanivola (lead type). Au vulica na porokaramu ena kompiuta me vakarautaki kina na misini kei na iyaya ni tabaivola.
Neirau siga ni vakamau
Ena 1980, keirau vakamau kei Helene, e dua na painia tudei. Me vakataki au ga, e dau taleitaka o Helene me sotavi ira mai na so tale na vanua, qai vulica nodra ivakarau ni bula. Neirau isausau me keirau lai vuli ena koronivuli o Kiliati qai cakacaka vakadaukaulotu.
Ena vuku ni noqu kila vakacakacaka, keirau a sureti kei Helene me keirau veiqaravi ena Peceli e Suwiteni. A vinakata na isoqosoqo me vakayagataka eso na iwalewale vovou ni tabaivola me vakavinakataka na cakacaka. Keirau mani lesi ena 1983 ena Peceli i Wallkill, Niu Yoka me keirau lai vulica e dua na porokaramu vou era bulia na tacida, e vakatokai me Multilanguage Electronic Phototypsetting System se na MEPS a .
Caka tiko na misini ni MEPS me vakayagataki e Hong Kong, Mexico, Nigeria, kei Sipeni
Keirau sa qai kila, ni qo e dua na porokaramu ni kompiuta e vakarawarawataka na kena tabaki na veimataqali matanivola ni duidui vosa me lakovata kei na kena iyaloyalo. A neirau itavi me keirau veivuke ena kena buli eso tale na matanivola ena MEPS, me rawa ni tabaki na noda ivola ena levu tale na vosa. Me yacova mai qo ni sa oti e vicasagavulu na yabaki, era sa tabaka tiko na iVakadinadina i Jiova na itukutuku vinaka ena sivia na duanaudolu na vosa!
Toso na gauna, keirau lesi kei Helene i Esia me keirau lai veivuke ena kena vakaikuritaki eso tale na vosa ena MEPS. Keirau nanamaki qai tu vakarau me keirau lai veivuke ena kena vakarautaki na itukutuku vinaka ena levu tale na vosa!
Ni Veisau na iVakarau ni Bula
Ena 1986, keirau gole kei Helene i Idia. E duidui sara vakalevu na ivakarau ni bula ena vanua ya! Ni keirau yaco yani i Bombay, sa kilai tu nikua me o Mumbai, keirau veilecayaki sara ga ni duatani na vanua qo. Sa duidui sara ga vakalevu o Suwiteni kei Idia! Neirau imatai ni macawa, keirau sa vakanananu sara ga i vale.
Ia ni oti qori keirau sa vakadeitaka e dua na ka: ‘Keirau dau vinakata tu me keirau daukaulotu. Qo ni keirau sa lesi tu ena dua na vanua, na cava tale me keirau lesu kina? E vinakati ga me keirau vosota qai vakamatauni keirau.’
Keirau mani saga me keirau vulica vinaka na ivakarau ni bula ena vanua qo. Ni keirau cakava qori, e totolo ga neirau marautaka na vanua qo o Idia. Me yacova mai nikua, keirau sa kila e rua na vosa vakaIdia, na Gujarati kei na Punjabi.
Gole i Myanmar
Dara nodra isulu ni vanua ena Vale ni Soqoni e Myanmar
Ena 1988, keirau lesi i Myanmar, e toka ena kedratou maliwa o Jaina, Idia, kei Tailadi. A yaco tiko na tikoyavavala vakapolitiki i Myanmar ena gauna ya, qai lewa tu na mataivalu e dua na iwase levu ni vanua. Ena gauna ya, se sega ni tiko ena MEPS na matanivola ni vosa vakaMyanmar, a sega tale ga ni dua na porokaramu va qori ena vanua ya. Na imatai sara ga ni ka keirau saga qori, ya me keirau raica mai na matanivola kece vakaMyanmar qai kauta i Wallkill me biu ena MEPS.
Ni keirau tiko ena raraniwaqavuka, a maroroi tiko ena kato nei Helene na volaitukutuku ni matanivola qori. Me vaka ni se yaco tiko na tikoyavavala vakapolitiki, a rawa sara ga ni keirau vesu ke tobo vei keirau na volaitukutuku qori. Ia ni caka vei keirau na vaqaqara, a taura cake tu ga i ligana o Helene na beki qori. A sega ni dua e kidava!
Na MEPS e vakavinakataka noda tabaivola
Sa qai vakarautaki vei ratou na daunivakadewa vakaMyanmar na laptop, na printer, ratou qai vulica tale ga na vakavakayagataki ni MEPS. E levu vei ratou qori se qai vakadua me ratou raica na kompiuta, ia ratou tu vakarau me ratou vuli. Sega ni dede, sa sega ni qai gadrevi me ratou vakanuinui ena misini ni tabaivola makawa, e dau vakayagataki kina na peleti kaukamea ni matanivola. Kena ibalebale, sa na qai rairai vinaka ga na noda ivola.
Gole i Nepal
Ena 1991, keirau lesi kei Helene me keirau veivuke i Nepal, e toka ena babaceva ni veiulunivanua na Himalayas. Se qai dua ga kina na ivavakoso ena gauna ya, se lailai tale ga na noda ivola ena vosa vakaNepali.
Sega ni dede, sa vakadewataki e levu noda ivola qai veisoliyaki ena yalava. Ena gauna qo, sa voleka ni 3,000 na iVakadinadina i Jiova ena 40 na ivavakoso e Nepal, qai sivia na 7,500 era tiko ena iVakananumi ni Mate i Karisito ena yabaki 2022!
Na Brochure ena Vosa vakaLahu
Ena loma ni veiyabaki ni 1990, era lai vunau eso na daukaulotu mai na siti o Chiang Mai, e Tailadi vei ira na vosa vakaLahu. Qori na nodra vosa na lewenivanua era toka volekata na iyala ni vanua kei Jaina, Laos, Myanmar, Tailadi, kei Vietnam. Ia se sega ni dua noda ivola e tabaki ena vosa qori.
E qai vakadewataka na brochure “Raica! Au sa Vakavoutaka na ka Kece” e dua na cauravou. E vakadewataka mai na vosa vakaTailadi ina vosa vakaLahu. Na cauravou qori e vuli iVolatabu tiko kei ratou na daukaulotu. Eratou qai kumuni ilavo na cauravou qori kei na vica tale na lewenikoro vosa vakaLahu qai vakauta kei na brochure qori ina valenivolavola ni tabana. Ena nodratou ivola, ratou vakaraitaka ni ratou vinakata mera mai kila na ka dina ena brochure qori o ira kece na vosa vakaLahu.
Oti e vica na yabaki, keirau marau kei Helene neirau veivuke ena nodra vakavulici na daunivakadewa vakaLahu ena kena vakayagataki na MEPS. Dua vei ratou qori e se qai papitaiso vou ga qai veiqaravi tiko ena ofisi ni vakadewa e Chiang Mai. Keirau kurabui sara ga ni qori ga na cauravou a vakadewataka na brochure “Raica! Au sa Vakavoutaka na ka Kece” ena vosa vakaLahu!
Ena 1995, keirau sa lesu tale kei Helene i Idia, me vukei ira na daunivakadewa ena valenivolavola ni tabana ena nodra vakayagataka na MEPS. Nikua, dua na ka na levu ni ivola sa tabaki ena levu na vosa ni vanua ya. Qori e vukei ira na lewenivanua mera vuli iVolatabu qai toso sara mera papitaiso.
Bula Marautaki Dina
Tekivu mai na 1999, keirau sa veiqaravi tiko kei Helene ena valenivolavola ni tabana e Peritania. Keirau cakacaka voleka kei ratou na tabana ni MEPS Programming ena itikotiko liu. Dua na ka neirau marau ni levu na gauna keirau vunau rawa e Lodoni vei ira na vosa vakaGujarati kei na Punjabi! Ni dua na vosa vou e biu ena jw.org, keirau dau saga sara me keirau vunau ena yalava vei ira na vosataka na vosa qori.
Au marau sara ga niu a vakatulewataka niu se gone meu sauva noqu isausau vakayalo, qai sega ni muri ira noqu icaba era guta na marau. Ni keirau rai lesu kei Helene, keirau sega ni veivutunitaka neirau vakatulewa me keirau veiqaravi vakatabakidua. Keirau marau ni keirau sa bau sikova rawa e 30 na vanua, keirau qai vakadinadinataka na kena tete na itukutuku vinaka ena veimatanitu, veiyavusa kei na duivosavosa!—Vakatakila 14:6.
a Sa kilai ena gauna qo me Multilanguage Electronic Publishing System. Sa vakayagataki tale ga na MEPS ena ivola e biu ena iyaya vakalivaliva.
