ME VAKARAWARAWATAKA noda kila se o cei dina na Mesaia, na Kalou o Jiova a vakavuna mera vola e levu na parofita eso na ka me baleta nona sucu, nona cakacaka vakaitalatala, kei na nona mate. Na parofisai kece qo me baleti koya na iVakabula era vakayacori vei Jisu Karisito. Eda druka nida raica ni a donu vinaka qai matailalai na veika a tukuni ena parofisai me baleti koya. Meda dikeva me kena ivakaraitaki na ka e tukuni tu me baleta nona sucu kei na ka ena yaco ni se gonelailai.

A parofisaitaka na parofita o Aisea ni na cadra mai na Mesaia ena iyatukawa i Tui Tevita. (Aisea 9:7) A qai sucu dina o Jisu ena iyatukawa i Tevita.—Maciu 1:1, 6-17.

E dua tale na parofita ni Kalou, o Maika, a parofisaitaka ni gone qo ena sucu ena koro o “Peceliema Efiraca,” ena qai yaco o koya me iliuliu. (Maika 5:2) Ena gauna a sucu kina o Jisu, a rua tiko na koro o Peceliema e Isireli. Dua a toka volekati Nasareci ena vualiku ni vanua, kena ikarua a toka volekati Jerusalemi e Juta. A yacana taumada na koro o Peceliema e Juta, o Efiraca. Oya sara ga na koro a sucu kina o Jisu, me vaka ga a parofisaitaki!—Maciu 2:1.

E tukuni ena dua tale na parofisai ni na kacivi “mai Ijipita” na Luve ni Kalou. A kau i Ijipita o Jisu ni se gonelailai. E qai vakayacori na parofisai qo ni sa kau lesu, ena gauna sa mate kina o Eroti.—Osea 11:1; Maciu 2:15.

Na iyaloyalo ena tabana e 200 o na raica kina ni veitikinivolatabu era volai tu ena ruku ni ulutaga “ Parofisai,” e vakamacalataki kina eso na ka me baleti koya na Mesaia. Veidutaitaka mada na veitikinivolatabu qo kei na veitikinivolatabu era volai tu ena ruku ni ulutaga “Kena Vakayacori.” Sega ni vakabekataki ni nomu cakava qori ena vaqaqacotaka nomu vakabauta na dina ni Vosa ni Kalou.

Ni o dikeva na veitikinivolatabu qo, nanuma tiko ni parofisai kece me baleti Jisu era volai ena vica na drau na yabaki ni bera nona sucu. E kaya o Jisu: “Ni dodonu mera vakayacori na ka kece e baleti au e volai ena Lawa e vola o Mosese, nodra ivola na Parofita, kei na Same.” (Luke 24:44) Era qai yaco dina na parofisai kece qo, me vaka o na vakadinadinataka ena nomu iVolatabu.