Na cava na iloloma vinaka duadua oni rawa ni solia vei luvemuni? E levu na ka era gadreva, wili kina nomuni loloma, veidusimaki, kei na veitaqomaki. Ia na iloloma talei duadua o rawa ni solia vei ira, oya nodra kilai Jiova kei na ka dina ena nona Vosa na iVolatabu. (Joni 17:3) Na kilaka va qori ena uqeti ira na luvemuni mera lomani Jiova nira se gone ra qai qaravi koya mai vu ni lomadra.​—Maciu 21:16.

E levu na itubutubu era sa raica nira taleitaka vakalevu na gonelalai ke lekaleka na vuli ra qai vakaitavi kina. E marautaki gona me vakarautaki yani na ivola Noqu iVola ni Vuli iVolatabu. Na lesoni yadua e kena inaki me rawarawa ga na kena vulici. Na iyaloyalo kei na kena ivakamacala e vakarautaki sara ga vei ira na gone yabaki tolu lako sobu. E tiko tale ga eso na idusidusi vei ira na itubutubu. E sega ni ka ni vakatatalo na ivola qo mera qitora na gone. Ia e vakarautaki moni wilika vata kei ira na luvemuni moni dau veivosaki vinaka kina.

Keitou nuidei ni na yaga vakalevu na ivola qo ena nomuni vakavulici ira na luvemuni ena ka dina ena iVolatabu nira se “gone dramidrami.”​—2 Timoci 3:14, 15.

Tacimuni,

iLawalawa Dauvakatulewa ni iVakadinadina i Jiova