Vei kemuni na lomani Jiova kei na nona Vosa, na iVolatabu:

E kaya o Jisu: “Oni na kila na ka dina, na ka dina ena qai sereki kemuni.” (Joni 8:32) Vakasamataka mada na imatai ni gauna o kila kina na ka dina ena iVolatabu! E ka ni marau nida mai kila na ka dina ena vuravura e levu kina na lasu.—2 Timoci 3:1.

E vinakata na Kalou o Jiova meda kila na ka dina. Nida lomani ira na kawatamata eda vinakata tale ga meda tukuna vei ira na ka dina. Ia e levu na ka e okati ena noda qaravi Kalou. Eda solia noda vinaka taucoko nida dua na lotu vaKarisito, nida doka vakalevu tale ga na ivakavuvuli i Jiova. E vakamacalataka o Jisu na sala bibi eda rawa ni vakadinadinataka vua na Kalou nida lomani koya. E kaya: “Ke dou muria na noqu ivunau, au na qai lomani kemudou tiko ga, me vaka ga na noqu muria na ivakaro i Tamaqu qai lomani au tiko ga o koya.”—Joni 15:10.

O Jisu e lomani Tamana dina, e cakava tale ga na ka kece e kerea vua o Tamana. Ke da vakatotomuri Jisu ena ivakarau ni noda bula, ena lomani keda o Jiova, eda na marau tale ga kina. Me vaka e kaya o Jisu, “Ke dou kila na ka kece qo, dou na qai marau ke dou cakava.”—Joni 13:17.

E nuitaki ni na yaga na ivola qo ena nomuni bulataka na ka dina ena iVolatabu, moni itokani tale ga ni Kalou. Keitou masulaka ni oni na lomana vakalevu na Kalou qai tiko ga “ena loloma ni Kalou . . . ni oni nuitaka tiko na bula tawamudu.”—Juta 21.