O SA bau rogoca mada me vosa e dua na asa? O na kaya beka: ‘Era sega ni dau vosa na manumanu.’ Ia na iVolatabu e kaya ni a vosa e dua na asa. Meda raica mada se a yaco vakacava.

Era sa voleka yani ina vanua o Kenani na Isireli. E rerevaki ira na Isireli o Pelaki na tui Moapi. Sa qai vinakata me lai kau mai o Pelami, e dua na tamata qaseqase me tauca na vosa mera kalouca kina na Isireli. A yalataka o Pelaki me solia vua e dua na ilavo levu. Ni rogoca ga, sa vodo sara yani ena nona asa o Pelami me lai raici Pelaki.

Ia e sega ni vinakata o Jiova me tauca na vosa oqo vei ira na nona tamata o Pelami. E qai tala mai e dua na agilosi vakaiseleiwau me tarovi Pelami. E sega ni raica na agilosi o Pelami. Ia na nona asa ga e raica rawa. E saga tiko na asa me gole tani mai vua na agilosi, ia ni sega ni rawa e dabe sara. Dua na ka nona cudru o Pelami, mani mokuti koya ena dua na kau.

E vakavuna o Jiova me vosa vei Pelami na asa qai taroga: ‘Na cava au cakava vei iko mo mokuti au tiko kina?’

E kaya o Pelami: ‘O cakava tiko na ka meu vaka tu kina na tamata lialia. Ke tu vei au qo e dua na iseleiwau au na vakamatei iko sara ga!’

E taroga tale na asa: ‘Au dau cakava beka vei iko na ka oqo e liu?’

E kaya o Pelami: ‘Sega.’

Sa qai vakaraitaka o Jiova vei Pelami ni duri tu na agilosi ena loma ni sala. E kaya mai na agilosi: ‘Na cava o mokuta tiko kina na nomu asa? Au a lako mai meu vakaosooso ena nomu sala mo kua kina ni lai tauca na vosa mera kalouca kina na Isireli. Ke a sega ni gole tani nomu asa, keu a vakamatei iko, qai bula ga na nomu asa.’

Sa qai kaya o Pelami: ‘Au sa tamata ivalavala ca. Au a sega ni kila nomuni duri tu e gaunisala.’ E laivi Pelami ga na agilosi me lako vei Pelaki. Se baci lai saga tale me tauca na vosa mera kalouca kina na Isireli. Ia e qai cakava o Jiova me vosa vakalougatataki ira vakatolu.