A VINAKATA o Mosese me lako vata kei ira na Isireli i Kenani. Sa qai kerea: ‘I Jiova, meu bau takoso ga ena Uciwai na Joritani, meu raica na vanua vinaka.’ Ia e qai kaya o Jiova: ‘Sa rauta! Kua ni tukuna tale mai!’ O kila na vuna e kaya kina oqori o Jiova?

E baleta tiko na ka a yaco ena gauna e samuta kina na vatu o Mosese. O se nanuma tiko ni rau a sega ni dokai Jiova kina kei Eroni? Rau a sega ni kaya vei ira na tamata ni o Jiova ga a vakadavea mai na wai ena vatu. Oqo na vuna e kaya kina o Jiova ni rau na sega ni lako ina vanua o Kenani.

Ni oti e vica na vula na mate i Eroni, sa qai kaya o Jiova vei Mosese: ‘Kauti Josua mai ena mata i Eliesa na bete kei ira na tamata. Tukuna vei ira kece ni sa iliuliu vou o Josua.’ E cakava sara ga na ka e tukuna vua na Kalou o Mosese me vaka o raica tiko oqori.

Sa qai tukuna o Jiova vei Josua: ‘Mo kaukaua, kua ni rere. Au na tiko vata kei iko ni o liutaki Isireli ina vanua au a yalataka tu vei ira, o Kenani.‘

E muri sa qai tukuna o Jiova vei Mosese me cabeta na Ulunivanua o Nipo ena vanua o Moapi. Ena rawa ni raica mai kea na Uciwai na Joritani kei na vanua totoka o Kenani. Sa qai kaya o Jiova: ‘Oqo na vanua au sa yalataka vei ira na luve i Eparama, Aisake kei Jekope. Au vakaraitaka ga vei iko. Ia o na sega ni lako kina.’

E mate tale ga mai na ulunivanua oqori o Mosese, ni sa yabaki 120. E se kaukaua tu na yagona qai rai vinaka tu na matana. Era tagi ena rarawa levu na tamata ena mate i Mosese. Ia era marau tale ga ni sa dua na nodra iliuliu vou, o Josua.