iTalanoa 54
Na Tamata Kaukaua Duadua
O KILA na yaca ni tamata kaukaua duadua a bau bula? Na yacana o Samisoni, a dua vei ira na dauveilewai. O Jiova e solia vua na kaukaua. A kaya o Jiova vei tinana ni se bera ni sucu: ‘Ena dua na luvemu tagane. Ena liutaka nodra vakabulai na Isireli mai na ligadra na kai Filisitia.’
Era tamata ca na kai Filisitia era tiko e Kenani. E levu tu na nodra sotia, ra qai dau vakamavoataki ira na Isireli. Dua na siga ni lako yani vei ira o Samisoni, a tavaki koya mai e dua na laione levu. E vakamatea ga ena ligana o Samisoni. E vakamatei ira tale ga na vica vata na drau na kai Filisitia.
E qai domona o Samisoni e dua na yalewa, o Tilaila. Era yalataka na iliuliu ni Filisitia vei Tilaila mera na solia yadua vua e 1,100 na tiki ni siliva ke tukuna vei ira na vu ni kaukaua i Samisoni. E vinakata na ilavo kece oqori o Tilaila. E sega ni itokani dina i Samisoni, se o ira na tamata ni Kalou. E vakatarogi Samisoni tiko ga baleta na nona kaukaua.
Kena itinitini, sa qai tukuna vua o Samisoni na vu ni nona kaukaua. E kaya: ‘Na drauniuluqu e se sega vakadua ni koti. Mai na gauna au sucu kina, sa digitaki au tu mai na Kalou. Ena oti noqu kaukaua ke koti.’
Ni sa kila rawa ga na vu ni nona kaukaua o Tilaila, e vakamoceri Samisoni qai kaciva mai e dua na tagane me kotiva na drauniuluna. Ni yadra mai e oti vakadua na nona kaukaua. Era vesuki koya rawa kina na kai Filisitia. Ra leuta tani na yaloka ni matana ruarua qai kauti koya me nodra bobula.
Dua na siga a caka e dua na nodra soqo levu na Filisitia mera sokaloutaka kina na nodra kalou o Tekoni, ra qai kauti Samisoni mai na valeniveivesu mera mai vakalialiai koya. Eda sega ni kila na dede ni nona a tiko e valeniveivesu ia sa tubu tale na drauniuluna. E kaya o Samisoni vua na gone e tuberi koya tiko mai: ‘Laivi au meu taura na durunivale.’ Sa qai masu vei Jiova me kerea vua na kaukaua ni sa taura tu na durunivale. E qai kaya vakadomoilevu: ‘Meu mate vata kei ira na kai Filisitia.’ Era lewe 3,000 na kai Filisitia era tiko ena soqo oya. Ni biliga mai o Samisoni na durunivale e lutuki ira ra qai mate kece kina.
