NI SA mate o Tui Jeropoami, o ira kece na tui era liutaka na 10 na yavusa ni matanitu ena vualiku i Isireli era ca. E ca duadua vei ira o Tui Eapi. O kila na vuna? Ni ranadi ca na watina o Jesepeli.

E sega ni yalewa ni Isireli o Jesepeli. E luve i tui Saitoni. E dau sokaloutaka na kalou lasu o Peali, qai rawai Eapi kei na levu vei ira na Isireli mera qaravi Peali tale ga. E cati Jiova o Jesepeli qai dau vakamatei ira na parofita ni Kalou. E so era dau lai tini vuni sara ena qara mera bula kina. Ke vinakata o Jesepeli e dua na ka ena rawa sara ga ni vakamatei koya e taukena tiko, me yaco ga kina na lomana.

Ena dua na siga a rarawa sara tiko vakalevu o Eapi mani tarogi koya o Jesepeli: ‘Na cava o rarawa tiko kina?’

E kaya o Eapi: ‘Au rarawataka na veika e kaya vei au o Nepoci. Au via volia nona werenivaini, qai sega ni rawa.’

Kaya sara o Jesepeli: ‘Kua ni leqa, niu na rawata vei iko.’

Sa qai vola e so na ivola o Jesepeli vei ira na turaga ena koro e tiko kina o Nepoci. ‘Dou kauta e so na tamata tawayaga mera beitaki Nepoci ni sa vosavakacacataka na Kalou kei na tui, dou qai kauti Nepoci ena taudaku ni koro me virilaki ena vatu me yacova ni mate.’

Ena gauna sara ga e kila kina o Jesepeli ni sa mate o Nepoci, sa qai kaya vei Eapi: ‘Lai taura me nomu na nona werenivaini.’ E dodonu beka me totogitaki o Jesepeli ena ivakarau ca oqo?

Lakolako, sa qai talai Jeu mai o Jiova me totogitaki koya. Ena gauna e rogoca kina o Jesepeli ni sa lako tiko yani vua o Jeu e sauni koya sara qai boroya na matana me rairai totoka. Ia ni yaco yani o Jeu e raici Jesepeli sara ena nona katubaleka, qai kaci yani: ‘Dou viritaki koya mai ra!’ Eratou viritaki koya sara ga na nona matanivanua me vaka o raica toka oqori. A mate kina qai mai oti vakadua e kea vua na ranadi ca o Jesepeli.