O KILA na vuna e masu tiko kina vei Jiova na turaga oqo? Na cava tale ga na vuna e mai biuta kina na ivola oqori ena mata ni icabocabonisoro i Jiova? Oqo o Tui Esekaia. E tui tiko ni rua na yavusa Isireli ena ceva. E sotava tiko na leqa levu. Na leqa cava beka?

Oqo na nodra sa vakarusa oti na mataivalu ni Asiria na 10 na yavusa ena vualiku. E laiva o Jiova me yacovi ira na veika oqori nira sa rui ca. Ia oqo era sa mai vala na mataivalu ni Asiria kei na yavusa e rua.

E se qai vakauta ga vei Tui Esekaia e so na ivola o tui Asiria. E mai biuta na ivola oqori ena mata ni Kalou o Esekaia. Na ivola oya e vakalialiai tu kina o Jiova, qai kaya vei Esekaia me soro. Oqo na vuna e masu tiko kina o Esekaia: ‘I Jiova, mo ni vakabulai keimami mai vei tui Asiria. Mera qai kila na veivanua ni o kemuni ga na Kalou dina.’ Ena rogoci Esekaia beka o Jiova?

E tui vinaka o Esekaia. E sega ni vakataki ira na tui ca ena 10 na yavusa ni Isireli, se vakataki tamana o Tui Easi, ni tui ca. E qarauna vinaka o Esekaia me muria kece na lawa i Jiova. Ni masu oti o Esekaia, sa qai kau mai vua na itukutuku i Jiova mai vei Aisea na parofita: ‘Ena sega ni curu i Jerusalemi na tui Asiria. Ena sega tale ga ni toro voleka mai e dua vei ira na nona sotia. Ena sega ni bau vanataki ina koro e dua mada ga na gasau.’

Raica na iyaloyalo ena tabana oqo. O kila se ra sotia ni vei era sa mate tu oqo? Era kai Asiria. A tala o Jiova nona agilosi qai vakamatea e 185,000 na sotia ni Asiria ena dua ga na bogi. A soro o tui Asiria qai lesu tale.

Era vakabulai na yavusa e rua, ra qai bula sautu na lewenivanua. Ia ni sa mate o Esekaia, e sosomitaki koya na luvena o Manasa. E rau tui ca o Manasa kei Emoni na luvena. Sa baci mai robota tale tu yani na vanua na itovo ca kei na ivakarau voravora. Nira labati Tui Emoni na nona dauveiqaravi, sa qai buli sara na luvena o Josaia me nodra tui na yavusa e rua.