OILEI! E vaka me leqataki vakalevu na bula i Taniela. Ia, era sega ni vakamavoataki koya na laione! O kila na vuna? O cei a biuti Taniela ina qara ni laione? Meda raica mada.

E tui tiko kei Papiloni ena gauna oqo o Taraiase. E taleitaki Taniela vakalevu ni turaga vuku qai dau veikauaitaki. E digitaki koya sara ga o Taraiase me iliuliu levu ni nona matanitu. E vakavuna mera vuvutaki Taniela kina e so tale era vakaitutu ena matanitu. Ra qai nakita e dua na ka ca me baleti koya.

Era lai kaya vei Taraiase: ‘Keimami sa lomavata kemuni na tui mo ni bulia e dua na lawa, me kua ni dua na tamata e masu vua na nona kalou me oti mada e 30 na siga. Ia mera masu ga vei kemuni. Ke dua e talaidredre, me qai biu ina qara ni laione.’ E sega ni kila o Taraiase se cava era vinakata kina me buli na lawa oya. Ia e nanuma o koya ni vinaka nodra vakatutu, mani vola sara e dua na kena lawa. Ia na lawa oqo sa na sega ni veisau rawa.

Ni sa kila o Taniela na veika e baleta tiko na lawa, e lesu ina nona vale me lai masu, vaka ga a dau cakava e liu. Era kila na tamata ca ni na sega ni muduka o Taniela na nona dau masu vei Jiova. Ia era marau baleta nira nanuma ni sa na mana na nodra inaki ca.

E rarawataka vakalevu o Taraiase ni sa qai kila na vuna era vakatura kina na lawa o ira na ilawalawa oqo. Ia sa sega ni rawa ni veisautaka, mani vakarota kina me biu o Taniela ina qara ni laione. Ia e vosa vei Taniela na tui qai kaya: ‘Au vakanuinui vua na Kalou o qarava tiko me vakabulai iko.’

E rarawa sara vakalevu o Taraiase qai sega ni moce rawa ena bogi oya. Ni qai mataka mai, sa cici yani ina qara ni laione. O rawa sara ga ni raici koya ni sa kacivi Taniela tiko. E kaya: ‘I Taniela na tamata ni Kalou bula! E a vakabulai iko li na nomu Kalou mai vei ira na laione?’

E sauma yani o Taniela: ‘A tala mai na Kalou na nona agilosi qai sogota na gusudra na laione.’

E marautaka vakalevu na tui qai vakarota me kau tani mai na qara ni laione o Taniela. Mera qai biu yani kina o ira na tamata ca era a bukiveretaki Taniela. Ni se bera mada ga nira tau vinaka yani i ra sa kati ira na laione, qai musuka na suidra taucoko.

Sa qai vola o Tui Taraiase vei ira na lewe ni nona matanitu: ‘Au sa vakarota mo ni rokova kece na Kalou i Taniela. E dau cakamana levu. A vakabulai Taniela mai vei ira na laione.’