ENA dua na siga a tukuna o Jisu vua e dua na tamata ni dodonu me lomana na kainona. Sa qai tarogi Jisu na turaga oya: ‘O cei na kai noqu?’ E kila o Jisu ni nona nanuma na turaga oya ni oqo o ira ga na lotu vata, kei ira na matatamata vata. Ia da raica mada na veika e kaya vua o Jisu.

So na gauna e dau talanoataka e dua na italanoa o Jisu me veivakavulici kina. A cakava sara ga na ka oqori o koya. E talanoataka e dua na Jiu kei na dua na kai Samaria. Eda sa vulica oti mai ni o ira na Jiu era dau veicati kei ira na kai Samaria. Ia e talanoataka oqo o Jisu:

Ena dua na siga a lako tiko i Jeriko e dua na Jiu. Ia era tauri koya vakaukaua na daubutako, ra butakoca kece na nona ilavo. Oti era sa qai mokulaki koya me yacova ni sa voleka ni mate.

Sa qai muri mai e dua na nodra bete na Jiu. E raici koya ni sa mavoa tu. O nanuma ni na vukei koya? Sega, e gole vakatikitiki qai lako tiko ga. Oti sa qai lako tale mai e dua na turaga daulotu. E dua na Livai o koya. A tu beka vakadua me vukei koya na tamata oqo? E sega tale ga. O rawa ni raici rau ni rau sa lako sara tiko yani vakayawa.

Ia raica mada, o cei e tiko vata kei koya na turaga a butakoci. E kai Samaria qai vukei koya tiko na Jiu oqo. E boroya na wainimate ena nona mavoa. Oti sa qai kauti koya na Jiu ina dua na vanua me rawa ni vakacegu kina me yacova ni sa bula vinaka.

Ni talanoa oti, sa qai kaya o Jisu vei koya a tarogi koya: ‘O cei vei iratou na le tolu oqo o nanuma ni vaka e weka i koya na tamata mavoa: O koya na bete, na Livai, se na kai Samaria?’

E sauma yani na tamata oya: ‘Na kai Samaria ni a lomani koya na tamata mavoa.’

E qai kaya o Jisu: ‘O sa vosa dina. Mo lai cakava sara ga vei ira na tamata kece me vaka ga a cakava o koya.’

O taleitaka na ivalavala ni veivakavulici i Jisu? E levu sara na veika bibi e rawa nida vulica kevaka eda vakarogoca na veika e kaya o Jisu ena iVolatabu.