O TIMOCI na cauravou erau tu vata oqori kei Paula. O koya e tiko ga mai Lisitira kei ratou na nona vuvale. Na yaca i tinana o Unaisi, na nona bubu o Loi.

Oqo na ikatolu ni nona sikovi Lisitira o Paula. Sa via oti yani e dua vakacaca na yabaki na nodrau a sikova na vanua oqo ena imatai ni gauna o Paula kei Panapasa. Ia erau sa baci veisiko yani oqo o Paula kei na nona itokani o Sailasa.

O kila beka na ka e tukuna tiko o Paula vei Timoci? E taroga tiko: ‘O vinakata mo tomani keirau kei Sailasa? O na rawa ni vukei keirau ena neirau vunau vei ira na tamata ina veivanua yawa.’

E sauma yani o Timoci: ‘Io, au vinakata meu lako tale ga.’ Oti ga oya, sa biuti ratou sara nona vuvale me tomani Paula kei Sailasa. Ia ni se bera nida vulica na nodratou ilakolako, da raica mada na veika sa yacovi Paula tiko. Sa rauta oqo e 17 na yabaki na nona a rairai o Jisu vei Paula ena sala i Tamasiko.

Nanuma tiko ni o Paula a lako i Tamasiko me lai vakacacani ira na tisaipeli i Jisu, ia sa mai dua oqo o koya na tisaipeli! Era sa qai nakita e so na meca mera vakamatei Paula nira sega ni taleitaka ni vakavuvulitaka tiko na veika baleti Jisu. Ia era vukei koya na tisaipeli me dro. Era tawani koya ena dua basikete e vesu tu ena wa ra qai tukuca yani vakamalua na basikete ena dakunibai.

Oti sa qai lai vunau i Anitioki o Paula. Oqo sara ga na vanua era mai vakatokai kina ena imatai ni gauna na imuri i Jisu mera lotu Vakarisito. Mai kea rau qai lesi tale o Paula kei Panapasa ena cakacaka vakavunau ina so na vanua yawa. E dua na koro rau vunau kina o Lisitira, na koro sara ga i Timoci.

Sa oti oqo e dua na yabaki qai mai veisiko tale o Paula i Lisitira, me ikarua ni nona veisiko. O kila beka na vanua ratou qai lako kina o Paula, Sailasa kei Timoci? Raica na mape meda vulica kina e so na vanua eratou lakova.

Taumada eratou lako i Ikoniona, tarava na koro levu o Anitioki. Oti ratou qai lako cake i Tiroa, vaka kina i Filipai, Cesalonaika, kei Peria. O raici Aceni ena mape? A vunau e kea o Paula. Oti oya ratou sa qai vunau voli me dua veimama na yabaki mai Korinica. Ratou cegu vakalekaleka i Efeso. Eratou qai vodo waqa lesu i Sisaria, me ratou lako cake i Anitioki, na vanua e tiko kina o Paula.

Sa vakalakova o Timoci e drau vakadrau na kilomita ena nona vukei Paula voli ena vunautaki ni ‘itukutuku vinaka’ qai tauyavutaki tale ga kina e levu na ivavakoso Vakarisito. Ena dua beka o iko na dauveiqaravi yalodina vakataki Timoci ni o sa qase mai?