Ke o vinakata mo itokani ni Kalou, e dodonu mo muria na ivakavuvuli ni lotu e vakadonuya na Kalou. E kaya o Jisu ni o ira na “lotu dina” era na qarava na Kalou me salavata kei na ‘dina.’ (Joni 4:23, 24) E duabau ga na sala dodonu me qaravi kina na Kalou. (Efeso 4:4-6) Na lotu dina ena basika ina bula tawamudu, na lotu lasu ena basika ina rusa.—Maciu 7:13, 14.

O na rawa ni kila na lotu dina ni o raici ira na bulataka na kena ivakavuvuli. E vinaka o Jiova, era tamata vinaka tale ga o ira era qaravi koya dina. Me vaka ga na kau vinaka ena vuataka na vua vinaka, ena vaka kina na lotu dina, era tamata vinaka na lewena.—Maciu 7:15-20.

Era doka dina na iVolatabu na itokani i Jiova. Era kila ni vakavuna na Kalou na iVolatabu. Era vakaliuca na ka e kaya na iVolatabu me dusimaka na nodra bula, mera walia kina na nodra leqa, me vukei ira tale ga ena nodra kilai koya na Kalou. (2 Timoci 3:16) Era saga mera bulataka na ka era vakavuvulitaka.

Era dau veilomani na itokani i Jiova. E vakaraitaka o Jisu na nona lomani ira na lewenivanua  ena nona vakavulici ira ena ka e baleta na Kalou kei na nona vakabulai ira na tauvimate. O ira na bulataka na ivakavuvuli ni lotu dina era dau lomani ira tale ga na tani. Me vakataki Jisu, era sega ni beci ira na dravudravua, se o ira na kaitani. E kaya o Jisu nira na kilai na nona tisaipeli ena nodra veilomani.—Joni 13:35.

Era doka na yaca ni Kalou, o Jiova, na itokani ni Kalou. Ke dua e sega ni via vakayagataka na yacamu, e nomu itokani voleka beka o koya? Sega! Ni dua e noda itokani, eda dau vakayagataka na yacana, eda tukuna tale ga vei ira na tani na ka vinaka me baleti koya. O koya gona, o ira era vinakata mera itokani ni Kalou e dodonu mera vakayagataka na yacana, mera dau tukuni koya tale ga vei ira na tani. Oqori sara ga na ka e vinakata o Jiova meda cakava.—Maciu 6:9; Roma 10:13, 14.

Me vakataki Jisu ga, o ira na itokani ni Kalou era vakavulici ira na tani ena ka e vauca na Matanitu ni Kalou. Na Matanitu ni Kalou na matanitu vakalomalagi ena veisautaka na vuravura me parataisi. O ira na itokani ni Kalou era kacivaka yani vei ira na tani na itukutuku vinaka oqo ni Matanitu ni Kalou.—Maciu 24:14.

Era saga na iVakadinadina i Jiova mera itokani ni Kalou. Era doka na iVolatabu, era dau veilomani tale ga. Era vakayagataka, era doka na yaca ni Kalou, era vakavulici ira tale ga na tani ena ka e vauca na Matanitu ni Kalou. O ira na iVakadinadina i Jiova era bulataka tiko na ivakavuvuli ni lotu dina ena vuravura ena gauna oqo.